Í Amsturdammi

Jæja

2010-07-25T15:00:00.002+02:00

Við Ásgeir höfum verið afslappaðir um helgina. Helder, portúgalskur danskennari kom í mat á föstudaginn. Við fórum í gær í Oosterpark, lágum í sólinni og lásum. Bökuðum svo pítsu. Í dag lestur, smá tiltekt og sitthvað fleira. Innan skamms ferð til Íslands.

Smá blogg eftir langt hlé

2010-07-04T15:07:00.003+02:00

Jæja, ekkert blogg mánuðum saman. Eins og venjulega eftir langt hlé er best að blogga í símskeytastíl:
- Ásgeir var á Akureyri í apríl og maí, setti þar á svið, ásamt Ingu og fleirum, verkið Aftursnúið.
- Mamma og pabbi komu í heimsókn. Við keyrðum m.a. til Maastricht.
- Ég fór til Akureyra í maí og sá frumsýninguna. Lenti í smá veseni út af öskufalli.
- Alanya, Tyrklandi í júní. Frábært ferð; sól, strönd, hiti, sjór, sundlaug, sólbrúnka.
- Á meðan við vorum í Tyrklandi var mamma Ásgeirs í íbúðinni okkar hér í Amsterdam.
- Ásgeir í DelTebre 2 vikur í byrjun júlí.
- Ég er núna að læra taugameinafræði mjög gaman.
- Sól, sumar og hiti í Amsterdam.
- Fótboltastemmning í Hollandi, sem ég fylgist reyndar lítið með.
- Ofnæmi, ofnæmistöflur.
- Kláraði tvær bækur; Blink og Karlar sem hata konur.
- Grillað með Sillu og Óla.

Það er án efa margt sem ég gleymi. En læt þetta duga í bili.

Skýrslan

2010-04-12T21:29:00.002+02:00

Las samantekt rannsóknarskýrslunnar. Þó að margt hafi legið fyrir kemur margt skýrar fram en áður. Svo margt fór úrskeiðis hjá stjórnvöldum að það er ótrúlegt. Það er líka makalaust hlutverk örlagavaldsins Davíðs Oddssonar.

Það er líkt og stjórnkerfið þurfi að byggjast upp frá grunni.

Tropenmuseum

2010-04-11T17:20:00.002+02:00

Góðri helgi er senn að ljúka. Skrapp ásamt Sillu og Óla á Tropenmuseum í dag. Þar skoðuðum við safngripi frá Suður-Ameríku, afríku og Asíu - margt frá nýlendutíma Hollendinga. Við í safnafélaginu drifum okkur þar sem það er ókeypis inn á söfn þessa helgina. Reyndar stendur til að kaupa árskort á söfn í Hollandi og fara síðan reglulega á sunnudögum. Safnaferðin í dag var eiginlega framhald af bæjarrölti í gærkvöldi þar sem við duttum inn á ótrúlegustu staði, m.a. stórfurðulegan stað þar sem var enginn plötusnúður heldur bara útvarpsstöð höfð á fullu blasti - með auglýsingum inn á milli. Á undan var matur hjá Sillu og Óla, ljúffengar íslenskar pulsur með öllu.

Á fimmtudaginn var hélt ég fyrirlestur um ristilkrabbameinsrannsókn á hollensku meinafræðidögunum. Þetta var góð reynsla en undirbúningurinn var frekar leiðinlegur. Það er ágætt að þetta sé búið.

Svo er Ásgeirs að vænta næstu helgi!!

Páskar

2010-04-05T17:14:00.003+02:00

Garðar var í heimsókn um páskana. Hann kom á föstudag og fór í morgun. Við fórum bæði laugardag og sunnudag út fyrir borgina, til Leiden og Utrecht. Báða dagana var hráslagalegt og blautt en við héldumst þurrir undir regnhlífum. Fórum reglulega inn á kaffihús milli þess sem við skoðuðum þessar gömlu borgir. Í Leiden álpuðust við í Hortus Botanicus, þann elsta í Hollandi, og sáum óteljandi afbrigði af orkedíum á sérstakri orkedíusýningu. Útigarðurinn var hins vegar varla kominn undan vetri. Við skoðuðum líka dómkirkjuna í Utrecht og fórum í frábæran páskamat til Valtýs og Eddu í gær. Sváfum út, skruppum aðeins út á lífið og horfðum á góða bíómynd.
Auk þess er að líða að hollensku meinafræðidögunum þar sem ég þarf að vera með fyrirlestur. Er að vinna í því honum. Hlakka til að vera búinn.

Sunnudagsblogg

2010-03-28T13:33:00.002+02:00

Ég nenni ekki að gera fyrirlestur og á erfitt með að koma mér að verki. Í næstu viku á ég að flytja fyrirlestur á hollensku meinafræðidögunum um hluta ristilrannsóknarinnar. Þetta er pínulítið spennandi því að ég hef ekki flutt áður fyrirlestur á ráðstefnu. Á fimmtudaginn verður æfingafyrirlestur. Svo get ég endurbætt fyrirlesturinn næstu helgi. Í rannsókninni var ristilkrabbamein ungra borið saman við aldinna og hægra megin í ristli borið saman við vinstra megin. Þetta er áhugavert efni en niðurstöðurnar ekki sláandi.
Ásgeir hélt af landi brott í gær með viðkomu í Kaupmannahöfn til að heimsækja Vigni. Ég er einn í kotinu og hef setið við skrif. Tók líka til og þvoði þvott. Hjálpaði líka Sillu í gær við flutninga og við fórum svo á sérkennilegan veitingastað í hverfinu. Þá gafst tími til að ná í mjög dularfullt bréf á pósthúsið, bréf sem reynt var að færa mér hér heim í ábyrgðarpósti - Ásgeir mátti ekki taka við því. Ég fór á pósthúsið með vegabréfið og fékk hið dularfulla bréf í hendurnar. Þá var þetta bara nýja kreditkortið, ekki meira spennandi en það. Svo hóf ég lestur á bók eftir Sigurð Nordal, bók sem Þórunn amma gaf mér fyrir langa löngu síðan. Ég hafði lengi ætlað mér að lesa bókina en ekki komið því í verk. Undanfarið hef ég tekið eftir bókarkilinum í hillu í stofunni og byrjaði svo dag einn að lesa í henni. Það var eins og bókin kallaði á mig. Hún heitir Áfangar og fjallar um tilgang lífsins, hvorki meira né minna.
Í nótt komst á sumartími og nú er tveggja tíma munur á Hollandi og Íslandi. Ég skildi ekkert í því hvað ég virtist hafa sofið lengi í morgun. Svo er það að nefna að Garðar bróðir kemur í heimsókn næstu helgi.

Vlieland

2010-03-23T20:28:00.003+01:00

Við Ásgeir fórum í helgarferð til Vlieland síðastliðna helgi. Ferðalagið tók tók tæpa 5 klukkutíma með lest, rútu og ferju. Vlieland er frísnesk eyja norðarlega í Hollandi, eitt strjálbýlasta svæði landsins með 1300 íbúa. Við komum þangað á föstudagskvöldi, leigðum hjól og gistum á góðu hóteli rétt fyrir utan þorpið. Við skoðuðum þorpið og fundum út að aðaltískufyrirbrigðið í gluggakistum eyjaskeggja var symmetría - þ.e.a.s. tvennt af einhverju, yfirleitt tveir vasar (oft með greinum) eða tveir blómapottar, stundum tveir kertastjakar. Við fórum út að borða í þorpinu, keyptum ís og fórum á bar og hlustuðum á trúbador. Svo hjóluðum við um eyna og fórum á afskekkt kaffihús, fengum bæði rok með smá rigningu og sólskin, gengum á langri hvítri strönd, horfðum á seglskútur, sáum hollensk sumarhús og helling af alls konar fuglum, skoðuðum gömul kort sem sýndu að eyjan var miklu stærri áður fyrr og heilt þorp var farið í kaf, horfðum á skemmtilegar bíómyndir, spiluðum, drukkum rauðvín og slökuðum á. Við fórum í túristabúð og keyptum tvö kerti til að hafa symmetrískt skraut heima.
Svo er það að frétta að ég fer nú daglega til den Haag þar sem fæ að kynnast réttarlæknisfræði. Stundum sé ég í fréttum hvort eitthvað verður að gera í vinnunni næsta dag. Í gær fór ég í réttarsal en það var mjög áhugavert að sjá.
Þar til síðar.

Kominn mars

2010-03-03T21:07:00.003+01:00

Margt hefur verið brallað síðan síðast.
- Axel og Eric komu í heimsókn, gistu eina nótt, skruppuð á djammið.
- Ásgeir vinnur þessa dagana sem statisti í óperu, ýmist munkur eða fangi.
- Dansverkið IOVIODIO, sem Ásgeir dansar í, var frumsýnt, gekk mjög vel.
- Keyptum borð í IKEA, sem varð til þess að við tókum til í öllum skúffum á heimilinu.
- 2 af 3 hjólum fóru í viðgerð í vikunni.
- Eyjólfur flutti til Utrecht, kom með okkur á djammið og gisti í Amsterdam.
- Ég vann lestarspilið, loksins.
- Ristilgreinin sem ég skrifaði í haust ásamt öðrum var samþykkt til birtingar í International Journal of Cancer.
- Höldum áfram að horfa á Will og Grace á netinu, komnir í seríu 3.
- Höldum einnig áfram að horfa á Lost, núna er 5. sería byrjuð.
- Verð 2 vikur í mars með réttarlæknisfræði-rotation. Þarf þá að fara til den Haag daglega. Á laugardag kúrs í blóðmeinafræði. Í apríl kúrs í cýtólógíu. Auk þess verð ég með fyrirlestur á hollensku meinafræðidögunum í byrjun apríl.
- Var á bakvakt í síðustu viku - aldrei hringt.
- Fylgst með Icesafe ... ætlar þetta aldrei að taka enda?
- Loksins farið að hlýna, ekki jafnkalt heima.
- Pabbi 65 ára.
- Ýmis áhugaverð sýni í vinnunni: 2 granulosa cell tumorar, Chagaz disease í smágirni, Malakoplakia í nýra, Langerhans cell histiocytosis, hepatocellular adenoma, hydrops foetalis, sacrococcygeal teratoma, synovial sarcoma, eosinophilic colitis, eosinophilic oesophagitis, autoimmune gastritis, embryonal rhabdomyosarcoma, ganglioneuroblastoma, ependymoma, retinoblastoma, perineurioma, enchondroma og margt fleira sem ég man ekki í svipinn.

Tími til kominn

2010-01-23T14:49:00.004+01:00

Er ekki kominn tími til að blogga aðeins? Jú, ég held það. Ýmislegt hefur drifið á daga okkar frá síðasta bloggi og þessi færsla verður í símskeytastíl.
- Gulli og Andrés voru hjá okkur yfir áramót. Við Ásgeir vorum báðir í fríi samtímis. Silla og Óli komu í mat á gamlárskvöld. Mikið stuð. Skruppum líka einn daginn í ferð til Gouda og Utrecht. Ævintýraleg dómkirkja í Utrecht.
- Hér var mjög kald í desember og byrjun janúar, sem betur fer orðið hlýrra núna. Allt fram á þessa viku var ís á sýkjunum. Núna rigning í staðinn, samt skárra en snjórinn.
- Var með 2 vikna rannsóknartíma í byrjun janúar - næsta grein fjallar um tímabreytingar á ristilkrabbamein á 35 árum.
- Fórum á Avatar og Sherlock Holmes í bíó, hvorutveggja góðar myndir.
- Matt frá Spáni var hjá okkur eina helgi, djamm.
- Stærðarinnar kaffiboð á sunnudegi.
- Út að borða á Bazar.
- Ásgeir æfir og æfir fyrir frumsýningu um miðjan febrúar.
- Ásgeir var slæmur í bakinu en lagaðist mikið eftir sjúkranudd.
- Skáphurðirnar eru byrjaðar að hrynja af Ikea-innréttingunni í eldhúsinu. Vesen.
- Það lak úr sturtunni okkar niður á næstu hæð. Búið að kítta og laga það.
- 2 hjól af þremur biluð.
- Will og Grace maraþon.
- Þorrablót Íslendingafélagsins í Hollandi.
- Spáð og spekúlerað í Icesave. Meiri skilningur meðal Hollendinga á málinu en áður. Hef reyndar þurft að hlusta á nokkra lélega Icesafe-brandara.
- Ásgeir og Óli verða aukaleikarar í óperusýningu í febrúar. Ásgeir verður fangi en Óli munkur. Þeir verða meðal 75 aukaleikara í stórri uppfærslu.
- Í kvöld: matur hjá Valtý og Eddu í Houten.
- Á morgun: árdegisbítur hjá Guðrúnu og Birni.
Eitthvað fleira? Sennilega en ég man ekki eftir því núna.
Kv Pétur.

Jólatrénu hent fram af svölum

2009-12-27T19:46:00.002+01:00

Þá er kominn þriðji í jólum og við erum reynslunni ríkari. Vitum núna að við getum haldið jól og séð um jólamat. Við fengum hvít jól hér í Amsterdam. Ég var á bakvakt en hún var róleg, fékk aðeins tvö símtöl en þurfti ekki að fara niður á spítala. Á Þorláksmessu keyptum við jólatré. Það eina sem var í boði var jólatré í potti. Kallinn á jólatrésölunni sagði að svona væri þetta orðið nú til dags. Tréð kæmi bara í potti í mold. Ég keypti tréð í grennd við spítalann hélt svo á því út á næstu metróstöð (sem var í 20 til 30 mínútna fjarlægð) og var orðinn búinn í handleggjum og öxlum. Þegar heim var komið var fallega grenitrénu okkar umpottað þannig að það stóð lárétt á stofugólfinu. Síðan skreyttum við jólatréð og tókum upp vídeójólakort sem núna er á youtube. Ég losnaði úr vinnu í fyrra fallinu á aðfangadag og komst loksins heim. Við höfðum hamborgarhrygg með brúnuðum kartöflum á aðfangadag, graflax í forrétt og hrísgrjónagraut ("rísalaman") í eftirrétt. Maturinn tókst vel og við opnuðum svo alla pakkana sem voru undir trénu. Reyndar fórum við að taka eftir því á aðfangadag að tréð var ekki líflaust. Litlir maurar birtust af og til, sennilega vöknuðu þeir til lífsins í hitanum. Ég setti upp límbandsvarnargarð. Hann hélt þessum stöku maurum í skefjum en það dugði samt ekki til. Þá var annar ytri límbandsgarður settur upp svo og þykkt sjampó í stóru undirskálina undir blómapottinum. Við rúlluðum upp maurunum með límbandsrúllu til að ná ryki úr fötum. Þegar þetta reyndist ekki virka sem skyldi var stríðinu við maurana tapað. Þeir voru nú ekkert ógurlega margir (náðum kannski 80 maurum) en við nenntum ekki að standa í þessu og losuðum okkur við tréð í gær. Við tókum skrautið af trénu, settum poka utan um rótina og hentum því fram af frönsku svölunum, ofan af þriðju hæð og niður á gangstétt þar sem tréð hlammaðist í stéttina. Vonandi varð maurunum bylt við þetta. Þarna bíður þetta fallega tré en eftir því að vera hirt af ruslakörlum. Þetta er ábyggilega eina tréð á svæðinu sem er strax komið út. Það gerir svo sem ekkert til. Á næsta ári verður keypt gervijólatré (svo vorum við líka með pínulítið ofnæmi fyrir trénu).
Silla og Óli komu í mat á jóladag (hangikjöt auðvitað). Þau komu m.a. með uppstú, vestfirskar flatkökur og eftirrétt. Fyrr um daginn lágum við í leti og lásum. Í gær var afslöppunardagur og í dag kom Marianna (samstarfsfélagi úr vinnunni) í hádegismat ásamt manni sínum og systur. Við höfum spilað mikið lestarspilið þessi jólin. Mér hefur tekist að vinna Ásgeir einu sinni (af ótal skiptum). Síðan höfum við prufað Heilaspilið sem var í möndlugjöf og annað spil sem Silla og Óli komu með sem heitir Spurt að leikslokum (held ég). Ekki á morgun heldur hinn koma Andrés og Gulli í heimsókn og verða hjá okkur yfir áramótin. Við hlökkum mikið til.

Smá helgarblogg

2009-12-14T02:07:00.002+01:00

Stutt blogg í símskeytastíl - klukkan er orðin allt of margt:
- Píanó komið heim í stofu. Við Ásgeir spilum jólalög fjórhent. Urðum að flytja til húsgögn.
- Ásgeir fór á fullt af danssýningum: í Rotterdam á þriðjudaginn, hér í Amsterdam í dag og Groningen á föstudag. Þar missti hannaf kvöldlestinni til Amsterdam. Gafst þá gott tækifæri til að kíkja út á lífið í Groningen með Ingu og fleira fólki úr dansinum.
- Fórum í bæinn um helgina og keyptum jólagjafir.
- Kristjana, frænka Ásgeirs sem er í námi í Delft, kom í kvöldmat í gær og gisti eina nótt. Ásgeir er orðinn snillingur að búa til Risotto. Við spiluðum lestarspilið (rosalega skemmtilegt spil).
- Will kom í kvöldmat.
- Fórum í kaffi til Sillu og Óla í kvöld. Ætlum öll að kaupa árskort á hollensk söfn.
- Búið að rigna heilmikið hér. Í dag þurrt en kalt.
- Ísland næstu helgi - hlakka til.

Helgarblogg

2009-11-29T19:22:00.002+01:00

Enn einni helginni að ljúka. Fór í gær í Body Pump í ræktinni - er allur lurkum laminn í dag, með harðsperrur og stirðleika. Við Ásgeir fengum gesti í mat í gærkvöldi; Renate og Sigrúnu. Renate býr í Rotterdam þar sem hún er í sérnámi í meltingarlæknisfræði og Sigrún er nýflutt hingað og er að læra hollensku áður en hún byrjar að vinna á kvennadeildinni á spítala í Amsterdam. Við Ásgeir fórum líka í bæinn í gær og ég keypti nýja síma og ... píanó! Loksins lét ég verða af því. Þetta var reyndar rafmagnspíanó en samt mjög gott að spila á það, hlakka til að fá það hingað heim næsta föstudag. Í dag fórum við svo niður í bæ á kaffihús og svo á danssýningu. Á morgun ný vinnuvika.

Færri blogg

2009-11-23T00:15:00.003+01:00

Hef ekkert bloggað í meira en mánuð. Þetta er einhvern veginn lögmál flestra blogga; smám saman fækkar færslunum. Þetta blogg verður í stikkorðastíl - upptaling á því sem hefur gerst frá því síðast:
*Fór til Den Haag að horfa á kynningu á því verki sem Ásgeir er að æfa og sett verður á svið í febrúar (Danshöfundurinn Gabriela Maiorino).
*Kúrs í ónæmisfræði og bólgu í Groningen.
*Palli Einars kom í helgarheimsókn frá Íslandi.
*Horft á Wil og Grace með Ásgeiri og ýmsar bíómyndir.
*Matarboð hjá Valtý og Eddu í Houten.
*Sigrún Perla flutti til Amsterdam til að fara í sérnám í kvensjúkdóma- og fæðingalæknisfræði.
*Ásgeir dansaði á þremur sýningum ásamt fleirum í verki eftir danshöfundinn Bruno.
*Ferð til Barcelona til að hitta Xavier, afmælisveisla í Pýreneafjöllunum og fjallganga.

Og sennilega eitthvað fleira.

Ásgeir kominn til Amsterdam, hættur í Alkmaar.

2009-10-04T14:14:00.003+02:00

Ásgeir kom á föstudaginn, loksins. Hann var í London á námskeiði og svo vinnubúðum í Gautaborg.
Lífið á Nieuwe Achtergracht er því komið í góðan gír. Framundan er vinna hjá Ásgeiri ásamt öðrum dönsurum hjá danshöfundnum Gabriela Maiorino.

Sjonni var í heimsókn síðustu helgi. Auk þess sem kom fram í síðasta pósti fórum við í tveggja tíma kanósiglingu í frábæru veðri í útjaðri Amsterdam. Endurnar máttu forða sér undan okkur. Svo fórum við í dýragarðinn í Amsterdam - sem reyndist miklu stærri og áhugaverðari en ég átti von á. Þá fórum einnig á píanótónleika. Sjonni skrapp til Haarlem á mánudegi en þar reyndist allt hið áhugaverða vera lokað (alræmdar mándagslokanir sem við vitum núna um).

Hvað fleira? Jú, ég lauk vinnu í Alkmaar eftir ár þar. Þar var haldin kveðjuveisla í lok vinnudags þar sem ég fékk nokkrar gjafir; hollenska brandarabók, mjög flotta bók um brjóstameinafræði, blómvönd og bók þar sem allir starfsmennirnir voru búnir að skrifa hver á sína síðu eitthvað skemmtilegt, svo sem þakkir fyrir gott samstarf og óskir um velgengni í framtíðinni. Þetta var sérlega ánægjulegt og skemmtilegt. Ég sá um léttar veitingar sem Sjonni kom með frá Íslandi; þar var um að ræða alls kyns íslenskt nammi og svo smá smakk af harðfiski, lifrarpylsu og sviðasulta. Ég kem til með að sakna vinnunnar í Alkmaar - þar var mjög gott að vera. En mér finnst gott að þurfa ekki að ferðast 2 og hálfa klukkustund á dag héðan í frá.

Reif buxurnar

2009-09-26T14:15:00.002+02:00

Í einu eldra bloggi skrifaði ég um það hvernig spítalalóðin í Alkmaar er að hluta (svona 50%) til girt með hárri girðingu með gaddavír og til að komast í gegn þarf maður að fara í gegnum rammgerð hlið með göddum ofan á. Af einhverjum ástæðum er svo hliðunum lokað á kvöldin og þá þarf maður að fara út að framan og fara stóran krók til að komast á lestarstöðina. Enginn virðist vita af hverju þetta er svona, þetta er eitt af þessu skrýtna sem maður rekur sig á í útlöndum en heimafólki finnst sjálfsagt. Ég var seint á ferðinni og klifraði yfir hliðið líkt og ég hef reyndar oft gert áður. En núna var ég óheppinn - önnur buxnaskálmin festist í göddunum og það kom gat. Mig langar helst til að stoppa upp í lásana með drasli og eyðileggja þessi asnalegu hlið.
Sjonni er í heimsókn (ps hann biður að heilsa). Við fórum í gær á Ríkislistasafnið meðal annars. Í dag er förinni heitið í Amsterdamskóginn til að fara á kanó í lúxusveðri.
Pétur.

Enn eitt helgarbloggið

2009-09-20T22:50:00.002+02:00

Hvar á maður að byrja eftir stutt bloggstopp? Til dæmis með því að segja frá því að þarsíðustu helgi sótti Ásgeir um starf við dans hér í grennd við Amsterdam og fékk það. Það verðu að geta þess að það var á brattan að sækja; 400 manns sóttu um að fá að koma í prufuna, þar af fengu 150 að mæta á svæðið. Fyrsta val fór fram á föstudegi, næsta val á laugardegi og svo loks aftur á sunnudegi uns tæplega 15 manns voru eftir. Þá þurfti að velja 6 til starfans - og Ásgeir fékk auðvitað starfið. Danshöfundurinn heitir Gabriela Majorino (ég skrifa þetta ábyggilega ekki rétt).
Helgina þar á eftir komu Friðrik og Helga í heimsókn. Þá var auðvitað gert margt skemmtilegt, m.a. siglt um síki Amsturdamms á mótorbáti, gengið út um allt, slakað á og borðaður góður matur.
Ásgeir hélt til London síðustu helgi þar sem hann er búinn að vera á vinsælu dansnámskeiði. Hjá mér hefur verið mikið að gera í vinnunni. Ég á bara eina og hálfa viku eftir í Alkmaar - þá fer ég aftur á spítalann í Amsterdam. Fór í brúðkaup á föstudag, glæsilegar veitingar á litlum veitingastað í borginni sem var eingöngu nýttur í þetta, og síðan sigling um síki borgarinnar á gömlum lystibát. Í gær vaknaði ég snemma (þreyttur og myglaður) og fór á dagsnámskeið í nýrnameinafræði. Var svo þreyttur í gærkvöldi að ég gat varla staðið upp af sófanum. Framundan er ýmislegt en það helst að Sjonni kemur í heimsókn næstu helgi.

Ferðamánuður

2009-08-30T11:14:00.002+02:00

Þessi mánuður hefur verið mikill ferðamánuður. Í vinnunni sagði einhver í gríni að ég kæmi stundum til Hollands til að vinna aðeins. Ég er sem sagt búinn að fara til London, Stokkhólms og Graz, allt á 2-3 vikum. Ég fór í helgarferð til London til að hitta Jakob og Garðar bróður, gisti hjá Jakobi. Svo fór ég til Stokkhólms til að heimsækja Þorgeiri, Helgu, Árna og Steinunni. Þar gisti ég hjá Þorgeiri og Helgu. Ég hef komið oft til beggja staða þannig að ég hafði enga þörf fyrir að fara um allt eins og ferðamaður og gat notið þess að vera með öllum vinunum. Svo fór ég til Graz í Austurríki. Þar var ég í nokkra daga á kúrsi í brjóstameinafræði, frábært námskeið þar sem ég lærði mikið. Graz er líka skemmtilegur bær - get alveg mælt með því að fólk fari þangað. Ekki eru fyrirhugaðar ferðir á næstunni en reyndar fáum við heimsóknir, næstu helgi verða hér 2 vinkonur Ásgeirs sem koma til Amsterdam til að fara í prufu, svo koma Friðrik og Helga helgina þar á eftir og loks kemur Sjonni í lok mánaðarins.
Ásgeir var þennan mánuðinn 10 daga í burtu í Berlín. Þar tók hann þátt í verkefninu Bodies in Urban spaces. Í september fer Ásgeir á 2 kúrsa; einn í London og annan í Gautaborg auk þess sem fyrir liggja 2-3 prufur.

Kanó í Amsterdamse bos

2009-08-09T12:48:00.002+02:00

Við Ásgeir hjóluðum til útjaðars Amsturdamms í gær. Ferðinni var heitið til Amsterdamse bos (=skógur) þar sem við leigðum tvo einmenningskanóa. Skógurinn er langt undir sjávarmáli og um allan skóg liggur net af sýkjum. Svo rerum við eftir sýkjunum í frábæru veðri. Á leiðinni heim stoppuðum við á gamla ólympíuleikvanginum í Amsterdam (munið þið ekki eftir ólympíuleikunum í Amsterdam 1928?) þar sem fór fram Hið opna frjálsíþróttamót Amsturdamms. Héldum svo heim, borðuðum indónesískan mat og tókum Will og Grace maraþon, horfðum á svona 5 fimm þætti. Skoðuðum líka íslensku gleðigönguna á netinu sem virtist vera mjög skemmtileg.
Annars höfum við gert ýmislegt skemmtilegt okkur til dundurs. Ásgeir fór á ströndina á fimmtudag og síðustu helgi var auðvitað gleðiganga (gleðisigling!) hér í Amsterdam. Þá var mikið um dýrðir. Við fórum í frábært partí.
Sunnudeginum verður varið í þrif, frágang, matarinnkaup og þvott. Ásgeir heldur til Berlínar á fimmtudag til vinnu og verður þar í tæpar tvær vikur. Á meðan skrepp ég í tvær helgarferðir, fyrst til London og svo til Stokkhólms.

Um daginn gerðist atburður hér í Amsterdam sem staðfesti þá skoðun mína að maður eigi helst ekki að taka leigubíl á aðallestarstöðinni eða Leidseplein (lesist Lækjartorg). Það sem gerðist var að farþegi ætlaði að taka leigubíl á Leidseplein og leigubílstjórinn fór fram á 50 evrur fyrir ferðina (sem er auðvitað rugl innanbæjar því að startgjaldið er 7,5 evrur og ekkert bætist ofan á það fyrstu 2 kílómetrana). Leigubílstjórarnir eru oft einhverjir gaurar sem eru komnir í bæinn til að græða, ósjaldan einhverjir með glæpaferil að baki. Þeir fóru að rífast og það endaði þannig að farþeginn fór í burtu. Þá kom leigubílstjórinn (sem kunni Tai Kwon do) og sló í manninn í höfuðið að aftan, maðurinn féll niður og reyndist svo vera dauður! Við Ásgeir höfum slæma reynslu af leigubílstjórum hér (sjá eldri færslur!) og reynum í lengstu lög að taka ekki leigubíl.

Síðustu viku voru 5 krufningar, þar af voru tveir einstaklingar milli 40 og 45 ára aldurs sem létust úr kransæðastíflu. Það finnst mér ungt. Annars var mikið að gera - og ég sem hélt að það yrði aðeins rólegra þarna á sumrin.

Billy

2009-07-25T22:30:00.002+02:00

Við Ásgeir borðuðum ljúffengan mat í kvöld hér heima. Vitaskuld var það eitthvað sem Ásgeir eldaði. Hann fann uppskriftina í Jamie Oliver. Svo prufaði hann góða uppskrift af heimasíðunni hans Ragnars um daginn - ljúffengur réttur.

Holland hefur verið í fréttum heima. Sama er ekki beinlínis að segja um Ísland sem hefur vart borið á góma. Í DV var frétt um Hollendinga sem ætla að gera árás á Ísland og ná í IceSavepeningana. Ég las þessa síðu í gegn - greinilega samin af einhverjum með stórmennskubrjálæði. IceSavemálið hefur greinilega beint sjónum ruglaðra manna að litla Íslandi. Ég verð alls ekkert var við viðhorf af þessu tagi. Í augum flestra hér er IceSavemálið leyst, eða a.m.k. ekki á döfinni.

Ásgeir fór í vikunni og keypti bókaskápinn Billy í Ikea. Reiddi skápinn heim á hjóli - mikið afrek. Stofan okkar er orðin svakalega fín. Greinin mín um ristilkrabbamein (munur á hægri og vinstri hluta) er alveg að verða búin. Ég vinn að henni þegar tími gefst til og hún er alveg að verða tilbúin. Það verður frábært að klára hana.

Vinnan.. jú, það voru nokkur áhugaverð tilfelli þessa vikuna, t.d. útbreiddar fituembólíur í lungum eftir lærleggsbrot og aðgerð, nokkrar undirtýpur legbolsslímhúðarkrabbameins, vellus hair cyst, erythema chronicum migrans, palmoplantar pustulosis, atypical fibroxanthoma, goblet cel type hyperplastic polyp, nodular melanoma, mesonephric hyperplasia í leghálsi, anaplastic T frumu lymphoma, Kaposi sarcoma í forhúð.

Á næstunni Gay pride hér í Amsterdam, London, Stokkhólmur, Graz og síðustu 2 mánuðirnir í Alkmaar.

Bloggið

2009-07-16T20:14:00.002+02:00

Eru flestir hættir að blogga? Hér til hliðar er listi yfir ýmis blogg en flestir eru hættir.

Annars er allt gott að frétta. Það hefur verið aðeins minna að gera í vinnunni undanfarið og ég er yfirleitt kominn heim klukkan sjö. Við fórum síðustu helgi í kvöldmat til Valtýs sem er að læra barnalæknisfræði í Utrecht. Um þessar mundir erum við einu Íslendingarnir í sérnámi í læknisfræði í Hollandi. Það var mjög gaman að heimsækja Valtý og konuna hans, Eddu. Þau búa í þorpi rétt utan við Utrecht. Þetta þorp er fullkomið fyrir fjölskyldufólk og það var gaman að sjá hversu vel þau búa. Mér hafði verið sagt að það væri mjög gott að ala upp börn í Hollandi og svo sagði Edda mér að kannanir sýni að hollensk börn séu hamingjusömustu börn í heimi.

Við fórum á laugardaginn í danspartí á Melkweg en fyrr um daginn vann ég í enn einni greininni sem ég er að skrifa um ristilkrabbamein.

Vignir kom í heimsókn í dag og verður fram á sunnudag. Hér verður mikið stuð.

Svo er maður að spá í það hvað best sé að gera við peningana heima á Íslandi.... hmmm.

Staatslotterij

2009-07-11T10:08:00.004+02:00

O, vann ekkert í lottóinu hollenska, staatslotterij - hæsti vinningur var 24 milljónir evra auk fjölda smærri peningavinninga en ég vann ekkert á eina lottómiðann sem ég keypti á 15 evrur. Hæsti vinningurinn gekk reyndar ekki út (þeir draga ekki bara út á selda miða). Líkurnar á því að vinna stærsta vinninginn eru reyndar mjög litlar; maður þarf að hafa 6 tölustafi og tvo bókstafi rétta.

Ásgeir tognaði síðastliðinn sunnudag á ökkla og hefur verið mestmegnis heima þessa vikuna. Þetta kom sér mjög illa því að hann var bókaður í prufu í dag í Dusseldorf. Þrátt fyrir meiðslin fór Ásgeir með lest til Dusseldorf í morgun en ætlar að fara mjög varlega til að togna ekki aftur.

Síðusta helgi var mjög skemmtileg. Við fórum niður á strönd á laugardeginum, Zandvoort am Zee. Það er frábær strönd og sjórinn (Atlantshafið!) var meira að segja hlýr inn við land. Ég bjó til stórt sandfjall. Ásgeir og Inga æfðu dans en Kjarri tók myndir af öllu saman.

Í síðustu viku fór ég á námskeið, fyrst kvöldnámskeið í forstigsbreytingum vélindakrabbameins og svo á þriggja daga námskeið í sameindameinafræði. Framfarir í skilningi á sjúkdómum liggja í sameindalíffræði þannig að ef maður ætlar að vera með á nótunum er eins gott að setja sig inn í það efni sem fyrst. Það má segja að sameindameinafræði sé einu stigi lengra inn í líkamann en það sem ég geri dags daglega - en það er annars vegar að skoða vefina með berum augum og svo í smásjá. Sameindirnar sjást hins vegar ekki í smásjánni og þess vegna segi ég að þetta sé einu stigi lengra gengið.
Annars finnst mér stundum skondin sú vanþekking sem fólk hefur á því starf sem ég sinni. Það virðist til dæmis algengur misskilningur að halda að vefjasýni séu send í ræktun. Ræktun???? Jú, strok, vessar og vökvasýni eru send í sýklaræktun. Sýni frá sjálfum vefjunum eru sjaldnar send í sýklarannsókn en oftast í vefjarannsókn - skoðun á því hvernig vefur er byggður upp og hvaða sjúkdómar þar birtast.
En hvað hefur áhugavert drifið á fjörur mínar í vinnunni undanfarið? Granulomatous bólga í eista og eistalyppu, eitlaæxli í eista, teratoid carcinosarcoma í eggjastokk, serous krabbamein í legbolsslímhúð, rauðir hundar í húðsýni frá andliti, Meckels diverticulum með ectópískan brisvef, granulomatous bólga í lifur, phyllodes tumor í brjósti, tærfrumubrjóskkrabbamein, lifrarkrabbamein, legbolsslímhúð með anovulatory breytingar, dilateruð cardiomyopathia, hemochromatosis í lifur, lentigo maligna melanoma, pseudoangiomatous stromal hyperplasia í brjósti, aukabrjóst í handarkrika og ýmislegt fleira.
Og hvað stendur til nú um helgina. Jú, vinna í greininni sem ég er að skrifa. Hún fjallar um mun á krabbameinum hægra megin og vinstra megin í ristli og mun á gömlum og ungum ristilkrabbameinssjúklingum. Svo ætla ég í ræktina í dag.

Ásgeir átti afmæli

2009-06-28T12:45:00.003+02:00

Þetta hefur verið ein allsherjar afmælishelgi. Ásgeir átti afmæli á föstudag og ég var búinn að fá frí í vinnunni. Ferðinni var heitið til Zandfoort sem er strandbær hér í Hollandi. Þetta var óvissuferð en Ásgeir komst að því hvert við værum að fara þegar við komum á aðallestarstöðina. Við byrjuðum á því að fara í stóra sundlaug með rennibrautum, öldulaug og fleiru. Svo fórum við niður á strönd og busluðum í Atlantshafinu, sem var ekki nærri því jafnkalt og við bjuggumst við. Við skrifuðum í sandinn og sólbrunnum pínulítið. Þá héldum við aftur í bæinn og fórum í Vondelpark með hvítvín og Sushi sem við borðuðum með nokkrum vinum. Flúðum síðan undan úrhellisrigningu seint um kvöldið, fyrst undir næsta tré en síðan inn á veitingastað í garðinum þar sem við sátum þar til slotaði.
Á annan í afmæli fórum við til Alkmaar. Þar var miðaldahátíð og stór ostamarkaður. Búið var að dubba hluta miðbæjarins upp í miðaldastemmningu. Fjöldi fólks úr bænum var í búningum og þemað var drungaleg með holdsveiku fólki, plágu-jarðaför, kroppinbökum og vændiskonum. Ásgeir vildi komast þaðan út eftir 5 mínútur þar sem honum fannst þetta hræðilega leiðinlegt. Ýmsar spurningar vöknuðu, s.s.: Var svona mikill hávaði og áreiti á miðöldum? Voru götur svona troðnar af fólki? Gekk fólk um með hrossabresti? Eftir að hafa komið okkur út úr miðaldabrjálæðinu fórum við á bæjartorgið og smökkuðum allar tegundir af ostum og keyptum loks nokkra ljúffenga osta auk afmælisgjafar handa Ben, Frakka sem við þekkjum, en förinni var nefnilega haldið í afmælisveisluna hans um kvöldið. Við mættum fyrir utan Önnu Frank safnið klukkan átta og þar fór hópur fólks, afmælisgestir, um borð í veislubát sem siglt var um sýki Amstedam næstu tvo tímana. Boðið var upp á vín og veitingar. Því næst fórum við á galleríopnun á heimili einhverrar Wöndu, sem einn afmælisgesta þekkti. Þar var boðið upp á afganskan mat sem var ljúffengur. Því næstu fórum við á listaverkasýningu í antikraak-húsnæði sunnarlega í borginni. Antikraak er andheitið við hústöku en þá býr einhver í húsnæði sem ekki gengur að selja og gætir þess, þó aðallega þess að hústökufólk taki húsnæðið. Við héldum svo heim á leið, dauðþreyttir eftir daginn.
Nú er bara rólegur sunnudagur. Það hefur verið mjög hlýtt um helgina. Maður getur farið um á stuttermabol og stuttbuxum þó að komin sé nótt. Við sitjum nú hér og höfum opið út á svalir í hitanum. Ættum kannski að taka fram viftuna.

Amsterdam, Ísland, NY, Amsterdam.

2009-06-21T14:00:00.003+02:00

Hvar á maður að byrja eftir 4 mánaða hlé á bloggi?

Í stuttu máli fór ég til Íslands 23. maí. Það var tími til kominn að hitta Ásgeir! Á Íslandi:
-sá lokasýningu á verkinu Deadheads lament sem Ásgeir dansaði í ásamt bekkjarfélögum sínum.
-útskrift Ásgeirs í Borgarleikhúsinu og útskriftarpartí um kvöldið.
-brúðkaup Bjarka, bróður Ásgeirs, og Helgu.
-Bláa lónið.
-gönguferð upp að Glym á afmælisdaginn, sund í nýju sundlauginni í Mosfellssveit, kvöldmatur hjá mömmu og pabba og svo bíó.
-matur hjá Önnu og Óskari.
-viðkoma í meinafræðinni, að sjálfsögðu.
-hitti vini.
-fór á danssýninguna humanimal með Gulla og Andrési, og Ásgeiri auðvitað.
-góður matur og gestrisni í Álfabergi.
-borðaði langvíuegg.

Flugum frá Íslandi til NY 1. júní. NY:
-gistum á hóteli á Manhattan, fínt hótel sem við mælum með (Marcel at Gramercy).
-söngleikurinn Avenue Q.
-uppistand.
-danssýningin Fuerza Bruta.
-Empire State Building.
-rauðvín í Central Park.
-hittum oft vin okkar Ben Strothman sem býr í NY, frábær leiðsögumaður.
-hittum dansarann Will, vin Ásgeirs, í Brooklyn þar sem hann býr.
-Ellen´s diner með þjónum sem syngja Broadway lög.
-píanóbarinn Don´t Tell Mama.
-risakrabbi á sjávarréttastaðnum City Crab.
-Ásgeir sá í bakið á einhverjum frægum, ég engan.
-gengum út um allt; fjármálahverfið með Wall Street, Twin Tower staðurinn, Kínahverfið, Litla Ítalía, Greenwich Village, alls kyns breiðstræti, Broadway, Times Square, glæsiverslunarhús, Chelsea, Soho, risastórar byggingar, margt fólk, umferðargnýr og fleira og fleira.
-lærðum að gefa þjórfé.
-notuðum metró New York borgar og tókum taxa.
-Museum of Modern Art.
-Djamm
Frábær ferð. Flugum heim 8. júní, lentum í Dusseldorf og tókum lest til Amsterdam.

Síðan við komum heim: rólegheit, vinna, bíó í gær (Sunshine Cleaning), danssýning í Vondelpark, ný blóm á frönsku svölunum, kókosbrauð a la Ásgeir, gott veður og fleira. Fórum í gær á safn, Museum van Loon, sem er safn hér í Amsterdam er sýnir hýbíli mjög ríkrar fjölskyldu er stofnaði meðal annars Hollenska Austur-Indíafélagið sem hafði m.a. einkaleyfi á verslun í Asíu og þrælasölu.

Kv. Pétur.

Ams í dag, Rvk á morgun, NY eftir viku.

2009-05-22T20:26:00.003+02:00

Fer loks til Íslands á morgun. Ásgeir fjarri í rúmar 6 vikur. Get ekki beðið eftir því að komast á klakann! Margt skemmtilegt liggur fyrir, m.a. leikhúsferð, steggjun, fjallferðir, Bláa lónið, brúðkaup Bjarka bróður Ásgeirs, útskriftarveisla Ásgeirs, afmælið mitt og síðast en ekki síst verður förinni heitið síðan til New York eftir vikudvöl á Íslandi. Ég hef aldrei komið þangað og Ásgeir hefur ekki komið til Bandaríkjanna þannig að við erum báðir mjög spenntir.

Jakob og kærasti hans Augusto voru í heimsókn síðastliðna helgi. Það var rosalega gaman að fá þá í heimsókn. Hér var Eurovision-kvöld, borðað íslenskt lambakjöt og farið á galeiðuna. Við skoðuðum Amsterdam á hjólum og höfðum það gott.

Þessa vikuna hef ég lagt kapp við að klára hitt og þetta í vinnunni fyrir fríið. Mér tókst að klára nánast allt fyrir utan tvær krufningaskýrslur sem fengu að bíða. Í dag var kapphlaup við tímann. Ég kláraði að skera sýnin á þremur klukkutímum og fór svo milli sérfræðinganna með smásjárgler til að klára hitt og þetta. Reglulega er gert frammistöðumat. Eitt slíkt var gert í dag og var sérlega jákvætt - gat ég ekki verið annað en hæstánægður. Ég hef verið duglegur að kría út námskeið sem þeir hafa verið tilbúnir að samþykkja og borga. Er ánægður með Alkmaar.

Fylgist vel með fréttum á Íslandi, meira að segja betur en þegar ég var á Íslandi. Alltaf verður málið ljósara, í stórum mjög dráttum varð einkavæðing á almenningseigum (sjávarútvegur og bankar) þar sem fram fór skuldsetning sem síðan lendir á almenningi. Að baki þessu bjó fyrst og fremst græðgi.

Koma svo, gott veður á Íslandi!

Léleg bankaþjónusta?

2009-05-20T23:11:00.002+02:00

Ég ákvað að skjótast í bankann í gær, komst með herkjum úr vinnunni og ætlaði að millifæra á erlendan reikning. Ég fór í stóran banka í miðbæ Alkmaar, gekk að afgreiðsluborðinu og sagðist vilja millifæra á erlendan reikning. Þá var mér bent á viðskiptavinatölvu úti í horni. Ætlast væri til þess að maður sæi um allt slíkt sjálfur. Reyndar var til önnur tölva en hún var biluð. Þannig að það var aðeins til ein tölva í öllum bankanum til afnota fyrir viðskiptavini - og hún var auðvitað upptekin í dágóða stund því að þar var einhver kona að borga reikningana sína. Þetta var fáránlegt. Á meðan ég beið fjölgaði svo kúnnum sem þurftu að nota tölvuna en á meðan sátu afgreiðslukerlingarnar þrjár fyrir aftan afgreiðsluborðið sitt en gátu ekkert gert til að hjálpa viðskiptavinum sem tíndust inn, þeir áttu bara að fara í röð við tölvuna. Svo þegar kom að mér þurfti ég auðvitað hjálp við þetta en síðan strandaði ég fljótt aftur. Þá var fólk fyrir aftan mig orðið pirrað á biðinni þannig að ég ákvað að hætta þessu og fór - án þess að klára millifærsluna. Það hefði verið mjög fljótlegt og einfalt að fá bara hjálp gjaldkera við þetta.
Hvað var í gangi? Jú, þróunin í bankaþjónustu hér í Hollandi er sú að fólk eigi að gera allt sjálft á netinu og gjaldkerar í bönkum eru nánast útdauð stétt. Hollendingarnir í vinnunni segja að þetta sé vandamál. Gamalt fólk sem ekki kann á tölvu lendir í vandræðum og það er vonlaust fyrir börnin að fara með klynk úr sparibauknum í bankann til að leggja inn á reikning. Þó að netþjónustan sé fín þá var ágætt að geta nýtt sér þjónustu gjaldkera af og til. Ég er á móti þessari þróun sem er greinilega einhvers konar sparnaðarráðstöfun með niðurskurði á þjónustu.

Holland skattaparadís

2009-05-06T23:51:00.003+02:00

Hollendingar eru aldeilis ekki ánægðir. Í baráttu gegn undanskoti undan skatti hafa Bandríkin gefið út lista yfir skattaparadísir og þar kemst Holland á blað. Ég var nú búinn að heyra það áður að hér væru mjög lágir skattar fyrir fyrirtæki og þess vegna tugir þúsunda póstkassafyrirtækja skráð hér en með starfsemi annars staðar. En Hollendingar voru sko ekki ánægðir með að lenda á þessum svarta lista og fjármálaráðherrann mótmælti, talaði um misskilning og sagði að fyrirtæki vildu vera hér út af góðri tungumálakunnáttu, háu menntunarstigi og nálægð Amsterdam og Rotterdam við góðar flugsamgöngur á Schiphol. Ég hef litla trú á þessum skýringum og tel að auðvitað skipti lágur skattur mestu máli. Hollendingar bjóða nefnilega upp á 25,5% skatt (sem er í lægra meðallagi) og hafa viljandi ýmis göt í skattalöggjöfinni sem gerir fyrirtækjum kleyft að sleppa við skattgreiðslur. Það er ekki skrýtið að almennir Hollendingar skuli vera hissa því að skattlagning á almenna borgara er alls ekki lág. Svo kom næsta frétt um að Bandaríkjamenn hefðu tekið Holland út af listanum og hollensk stjórnvöld töluðu um að misskilningur hefði átt sér stað. Hvaða pólitík ætli hafi farið fram þarna á bak við tjöldin?

Mamma og pabbi í heimsókn

2009-05-05T13:48:00.003+02:00

Mamma og pabbi voru hér í heimsókn. Þetta hefur verið frábær helgi. Þau komu á fimmtudaginn í síðastliðinni viku, á drottningardaginn. Það er mikill partídagur hér í Amsterdam. Inn í borgina komu 600 þúsund manns og hér var stemmning sem minnir helst á verslunarmannahelgina, á götum, torgum og bátum á síkjunum. Við gengum um miðbæinn og skoðuðum stemmninguna í blíðskaparveðri. Fórum á ítalska veitingastaðinn hér handan við hornið um kvöldið. Seinna í ferðinni fórum við svo á frábæran indónesískan veitingastað hér í grenndinni. Sunnudagskvöldið elduðum við hér heima stóran hvítan aspas og íslenskt lambakjöt. Allt hið helsta í Amsterdam og utan borgarinnar var skoðað. Mamma og pabbi fóru til Alkmaar á föstudaginn að skoða ostamarkaðinn og líta í búðir. Svo fórum við víða um helgina á bílaleigubíl; við skoðuðum ekta hollenska bæi og þorp (Volendam, Hoorn, Haarlem, Leiden), fórum á blómahátíð í Anna Paulowna, sáum túlípanaakra og ótal vindmyllur og skoðuðum háa sandgarða og hollenskar strendurnar. Hér var ljúffengur morgunverður alla morgna og heppnin var með okkur hvað veður varðaði. Nú styttist svo í að ég fari til Íslands.

Kosningar

2009-04-26T12:07:00.004+02:00

Mér líst ágætlega á niðurstöðurnar úr kosningunum. Hið jákvæðasta er að það er mikil endurnýjun, konum fjölgar og nýr óspilltur flokkur kemst inn á þing. Sjálfstæðisflokkurinn tapaði miklu í samræmi við það að hafa átt stóran þátt í að koma Íslandi á hausinn, hefði eiginlega mátt tapa fleiri þingmönnum. Það var mjög fínt að Sigurður Kári skyldi detta út en fáránlegt að hinn ömurlegi Árni Johnsen skuli haldast inni (er fólk bilað að kjósa þennan mann?). Af fleirum sem hefðu gjarnan mátt detta út má t.d. nefna Birki Jón Jónsson, Össur Skarphéðinsson, Björgvin G. Sigurðsson, ögmund Jónasson og Guðlaug Þór Þórðarson. Sjálfstæðisflokkurinn er enn og aftur með hlutfallslega fáar konur. Svo var athyglisvert hvernig fjölmiðlar útilokuðu Ástþór í kosningabaráttunni, það var hálfgert einelti.

Annars fylgist maður aðeins uggandi með fréttum af svínaflensunni. Samkvæmt hefur 81 dánið úr flensunni. Í einni fréttinni kom fram að í Mexíkó hefðu 59 (7%) dáið af 854 sem greindust með lungnabólgu. Sjálfsagt er fjöldi þeirra sem smitast en fær lítil eða engin einkenni mun hærri en 854. WHO lýsir yfir áhyggjum þar sem flensan er strax orðin útbreidd og óvanalegir aldurshópar hafa smitast (þ.e. ekki bara ungir og gamlir eins og í flestum flensum).

Hef verið býsna duglegur þessa helgina. Ég setti mér nefnilega það takmark að klára næstu grein um ristilkrabbamein. Ég er ekki viss um að það takist en ég er mjög langt kominn. Svo koma Mamma og pabbi næstu helgi í heimsókn, verða hér í fimm daga. Þau koma á drottningardaginn en það er mikill frídagur hér í landi, hálfgerður sautjándi júní.

Bók

2009-04-18T13:44:00.002+02:00

Kláraði í morgun bókina Konur eftir Steinar Braga. Þetta er óvenjuleg bók, spennandi. Ég bjóst við öðruvísi enda á bókinni og þegar ég kláraði hana henti ég henni frá mér. Mér leið ekki vel fyrst eftir lesturinn. Í stuttu máli fjallar þetta um konu sem er leidd í gildru, blekkt og hneppt í ánauð. Umhverfið er Ísland útrásarinnar. Ég á erfitt með að gera upp við mig hvort bókin fjallar um konur sem leiksoppa í veröld karlmanna eða raunverulega íslenskan almenning sem strengjabrúðu peningamanna.

Það hefur verið mikið að gera í vinnunni þessa vikuna. Hef líka séð nokkur áhugaverð tilfelli; elastofibrosis, nodular melanoma, balloon cell melanoma, leg með placenta increta, eosinophilic cholecystitis, sjaldgæft afbrigði af og graftarkýli í fylgju vegna Listeria-sýkingar. Ef ég ber saman við það sem ég sá heima er meira af öllu en samt í svipuðum hlutföllum, fyrir utan það að húðæxli eru miklu algengari.

Páskahelgi

2009-04-13T11:33:00.003+02:00

Við Ásgeir erum búnir að hafa það mjög gott um páskahelgina. Hér hefur verið 15-20 stiga hiti, sól og frábært veður. Það var reyndar venjulegur vinnudagur hjá mér á föstudaginn langa (fáránlegt, ekkert frí!!) en eftir vinnu fórum við í Vondelpark og drukkum bjór með vinum. Þar var m.a. einhver frakki sem reyndist vera smásjársölumaður og var að reyna að selja mér smásjá á 30.000 evrur. Eftir það fórum við og hittum Renate og Róbert kærasta hennar, Renate flutti til Rotterdam fyrir skömmu síðan til að fara í sérnám í meltingarlækningum. Við fórum fyrst í túristagötuna og keyptum fáránlega dýrar pítsusneiðar. Ásamt þeim fórum við á lokakvöld Mediamtic, sem er eins konar gallerí. Þar lét ég spá fyrir mér, ég dey víst 86 ára gamall. Einnig lét ég farða mig sem aldraðan og fékk hárkollu með gráu hári. Þá var boðið upp á að maður skreytti sína eigin líkkistu, við Ásgeir nenntum því ekki.
Á laugardag fórum við í paintball. Það var mjög gaman. Anna Þóra, gömul vinkona Ásgeirs, sem nú er flutt til Amsterdam skipulagði litboltaferð í tilefni af afmæli kærasta síns. Ég var búinn að fara í litbolta áður á Íslandi og þetta var allt öðru vísi. Það voru margir mismunandi vellir sem við prufuðum, mjög gaman. Um kvöldið fórum við að sjá mjög spes danssýningu, meira um það síðar.
Í gær fórum við í árdegisbít (=brunch) hjá vinum okkar og fengum svo sjálfir gesti um kvöldið, Kjartan og Ingu, Önnu Þóru og James. Við vorum með íslenskt lambakjöt í aðalrétt. Anna Þóra kom með lax í forrétt og Inga með súkkilaðiköku í eftirrétt. Spiluðum svo spilið Hmmmmmbug, þar sem maður á að humma lög og hinir eiga að giska, mjög gaman.
Í dag heldur Ásgeir til Íslands og þangað kem ég eftir 5 vikur.

Ásgeir kominn til Amsterdam

2009-04-05T11:55:00.001+02:00

Þá er Ásgeir kominn til Amsterdam. Hann verður hér fram yfir páska. Við skruppum á markaðinn í gær og keyptum blóm. Elduðum svo kjúklingarétt og horfðum svo auðvitað á Lost, byrjuðum þar sem frá var horfið í nýjustu seríunni. Alltaf verður þetta skrýtnara. Er einhver annar en við sem fylgist með þessu? Ásgeir fór síðan eldsnemma í morgun með lest til Þýskalands í prufu fyrir vinnu næsta vetur. Vonum að allt gangi að óskum.

Það var mikið að gera þessa vikuna. Ég brenndi mat við eldamennsku og það kom hrikaleg fýla í íbúðina - var öll kvöld vikunnar að þrífa og lofta til að losan við þennan óáran fyrir utan síðastliðið mánudagskvöld þar sem ég fór í brúðkaupsveislu. Ég klæddi mig eins og Íslendingar gera venjulega þegar þeir fara í brúðkaupsveislu - í jakkaföt, skyrtu og bindi. Þegar ég kom í veisluna sá ég að ég var sá eini sem var svona "formlega" klæddur, að brúðgumanum meðtöldum. Gat nú verið.

Svo hef ég séð ýmis áhugaverð tilfelli í vinnunni, borderline phyllodes tumor, chronich interstitial pneumonia, neuroendocrine brjóstakrabbamein, glycogen-rich brjóstakrabbamein, Brenner tumor í eggjastokki og útbreitt sarcoidosis í krufningu, svo eitthvað sé nefnt sem ég man eftir. Síðan er merkilegt hvað mikið er um af húðkrabbameinum. Venjuleg húðkrabbamein eru svo algeng að þau eru ekki einu sinni talin með þegar fjallað er um það hversu algeng krabbamein eru. Ég sé yfirleitt á bilinu 1-5 á dag. Þar að auki sé ég yfirleitt nokkur sortuæxli á viku. Þetta er hálfgerður faraldur sem tengist væntanlega sólböðum og slíku.

Svo fékk ég um helgina ritrýnda grein um ristilkrabbamein sem ég ásamt leiðbeinendum skrifuðum í Læknablaðið. Þarf nú að breyta greininni í samræmi við ritrýnina en það ætti ekki að taka lengri tíma en daginn í dag.

Flakkarinn bilaður

2009-03-28T18:27:00.004+01:00

Á síðasta ári eyðilagðist harða drifið í makkanum. Nú er flakkarinn bilaður, fór tímabundið í gang aftur en núna fæst engin tenging. Leiðinlegt, bögg, vesen. Við Ásgeir höfum notað flakkarann sem geymslu fyrir gögn, fyrst og fremst bíómyndir og ljósmyndir, en þar voru einnig alls konar afrit og skjöl. Nú er bara að sjá hvort einhver viðgerðarmaður telur sig geta komið þessu í gang eða ekki. Sem betur fer brenndum við nýverið allar ljósmyndir á geisladiska til öryggis. Allur dagurinn hefur farið í að vesenast í þessu, símhringingar, netið, tilraunir. Sjáum hvað setur.

Var á námskeiði í gær, dagsnámskeiði fyrir unglækna í meinafræði. Það var mjög fínt.

Það er ergilegt að sjá að krónan sé aftur að veikjast. Gagnvart evru var hún komin niður í 144 krónur en er nú í 160 krónum. Ástandið er greinilega mjög óstöðugt.

Svo er merkilegt að fylgjast með þessum landsfundum. Samfylkingin reynir að hreinsa sig af mistökum og Sjálfstæðismenn eru með fáránlegar ályktanir, s.s. varðandi kvótakerfið auk þess að vilja stefna nú að meiri einkavæðingu í menntakerfi og heilbrigðismálum. Eftir mistökin varðandi einkavæðingu bankanna hljómar allt tal af hálfu Sjálfstæðismanna um einkavæðingu mjög illa. Svo fær maður gubbuna alveg upp í háls þegar Sigurður Kári Kristjánsson, þingmaður Sjálfstæðisflokksins, lætur í sér heyra.

Eitt hef ég ekki skilið. Það er sú árátta öryggisvarða að girða spítalann í Alkmaar af. Spítalinn er að stórum hluta girtur með hárri vírgirðingu með þremur röðum af gaddavír efst. Nokkur hlið eru inn á lóðina aftanverða þar sem allir fara í gegn sem koma frá lestarstöðinni. Ekki er haft fyrir því að hafa öll hliðin opin til að spara fólki sporin og þegar komið er kvöld er hliðunum lokað. Svo að ekki sé hægt að klifra yfir hliðin eru gaddar ofan á þeim. Síðasta útspilið var að loka auka-stigahúsunum á spítalanum sem spöruðu manni ferð um allt sjúkrahúsið til að komast út. Það var gert án þess að láta vita þannig að eitt skiptið var ég kominn inn í stigahús en komst ekki út og varða að hringja í sjúkrahúsið til að unnt væri að hleypa mér út.

Annars er það að frétta að þetta verður róleg helgi. Svo er Ásgeir væntanlegur eftir viku, húrra!!!

Tónleikar

2009-03-23T00:07:00.002+01:00

Fór í kvöld á tónleika í Het Concergebouw. Það var píanistinn Sokolov sem spilaði verk eftir Beethoven og Schubert. Mér fannst gaman að hlusta á sónöturnar eftir Beethoven en ég hef aldrei verið sérstakur aðdáandi píanóverka eftir Schubert. Verkið eftir Schubert var langt, næstum endalaust. Sokolov er frábært píanisti. Hann notar sérstakan áslátt sem er mjög mjúkur og fínlegur. Svo er hann svolítið sérstakur. Þetta er gráhærður maður með sítt hár, stóran maga og klæddist auðvitað ekta kjólfötum. Hann gekk inn á sviðið ofan frá, studdi sig við handriðið, hneigði sig fram í sal og aftur í sal og byrjaði svo strax að spila áður en fólk var hætt að klappa. Hann nennti ekki að standa upp til að hneigja sig milli Beethoven-sónata. Svo þegar hann stóð upp hneigði hann sig fram í sal og svo aftur í sal og var byrjaður að ganga út áður hann rétti sig við - hann notaði eiginlega skriðþungann við að halla sér fram í seinna skiptið til að bera sig áfram. Svona hneigði hann sig í hvert skipti. Þá fór hann út af sviðinu til hliðar en ekki upp, eins og venjan er. Þar sem ég sat á fremsta bekk sá ég hvernig hann beið fyrir utan, hlustaði eftir klappinu og kom inn aftur. Hann hikaði ekkert við að spila aukalög, þau voru alls fimm, sem er meira en oftast. Við hliðina á mér var maður sem var mjög upprifinn yfir öllu saman, hann kiptist við að kæti við hvers kyns hljóðeffekta og stundum titraði höfuðið á óskiljanlegan hátt. Hinum megin voru kærustur, sennilega stelpur í tónlistarnámi, sem létu vel að hvor annarri með handstrokum á meðan þær hlustuðu á tónlistina. Uppi á sviði var svo ríka gamla fólkið sem virtist almennt býsna sátt, fyrir kannski utan leiðinlegt en vel spilað verk eftir Schubert.

Vor í loftinu

2009-03-22T01:40:00.002+01:00

Það er enginn vafi að vorið er að koma. Ég vaknaði í morgun og úti var 10 stiga hiti, sól og logn. Nú er opið út á frönsku svalirnar, virkilega notalegt.

Síðastliðna helgi var ég á Íslandi, heimsótti loks Ásgeir. Við fórum í sumarbústað eina nótt sem var mjög gaman. Fórum í göngutúr í nágrenninu og rennblotnuðum í rigninu, keyrðum blindbyl yfir Hellisheiðina, fórum í 2 afmæli á laugardagskvöldinu og borðuðum auðvitað góðan mat. Ásgeir kemur svo hingað eftir rúmar 2 vikur og verður hér yfir páskana. Vonandi helst góða veðrið hér.

Ég var svo óheppinn að fá augnsýkingu. Hvort sem það var út af einhverri veiru eða vegna augnlinsa var þetta vesen. Var með krem fyrir augun og sá þess vegna illa. Mér var sagt í vinnunni að ég liti út eins og ég hefði setið á sumbli alla nóttina. Þetta er sem betur fer að lagast.

Er orðið “boð” gamaldags? Mér var sagt það, ég er alls ekki sammála því. Skoðanir?

Svo er alltaf að verða augljósara og augljósara að græðgi varð íslensku fjármálalífi að falli. Menn fóru inn í fyrirtæki og banka, soguðu allt fjármagn út og skildu eftir rústir einar. Það er augljóst að réttur var brotinn, en allt leyfðist einhvern veginn og menn töldu sig komast upp með hluti í nafni frjálshyggju, viðskiptalögmála og peninga. Í bakgrunninum voru vissar alþjóðlegar aðstæður og innlend stjórnvöld sem vildu hreinlega hafa hlutina eins og þeir voru, þar með talið takmarkað eftirlit.

Skallaður

2009-03-08T11:30:00.005+01:00

Er búinn að hafa það mjög gott undanfarið. Hér voru Baldur og Felix í heimsókn, hef farið út öll kvöld og gert eitthvað skemmtilegt með þeim. Auk þess að fara út að borða, sækja bari og fara í bíó fórum við í innflutningspartí hjá Ali, bandarískri vinkonu minni, og svo skruppum við í árdegisbít (lesist brunch) hjá Pierre. Baldur er búinn að taka hollenskar franskar ástfóstri. Var reyndar svo óheppinn í gær að vera skallaður. Ég sneri mér við og í þann mund gekk einhver árans stelpa sem var að skrifa sms og hallaði höfðinu fram beint á mig og með ennið í kinnbeinið á mér. Það er öruggt að ég fæ marblett, vona bara að hann verði ekki mjög áberandi. Þá verður þetta alveg eins og ég hafi verið kýldur.
Hélt fyrirlestur í vinnunni í gær, gott að það sé búið. Það var um vissa gerð forstigsbreytingar eggjaleiðara- og eggjastokkakrabbameina. Hef séð ýmislegt í vinnunni núna, m.a. Langerhans cell histiocytosis í heila, intracystic papillary brjóstakrabbamein, amyloidosis í lunga, embryonal carcinoma í eista, neurofibroma með storifom vaxtarmynstur, GIST í maga.
Fór í klippingu. Staðurinn sem ég fór á síðast var bara lokaður. Það var sennilega bara ágætt því að ég hefði örugglega ekki fengið jafnfína klippingu þar og ég fékk hjá Serbanum Goran. Ég hjólaði um nokkrar götur og sá svo rakarastofu sem mér leist vel á. Ég hafði ekki áhuga á að vera klipptur upp á klassíska hollenska vísu (þ.e. hár greitt aftur með miklu geli) en sá stað þar sem virtust vera útlendingar við vinnu þannig að ég fór þar inn. Hann Goran sagði að ég hefði verið illa klipptur síðast í hnakkanum. Hann dundaði við verkið í rúman klukkutíma, sagðist hafa viljað vera myndlistamaður en ekki haft efni á slíku námi. Því hafi hann lært að verða klippari, svo sinnir hann myndlistinni meðfram.
Horfði á viðtalið við Evu Joly í Silfri Egils. Það var mjög áhugavert að heyra einhvern tala um efnahagsbrot sem þekkir þau mál mjög vel, mæli með viðtalinu. Hún sagði meðal annars að almenningur þyrfti nú að borga reikninginn fyrir alla glæpina og að reikningurinn væri svo óheyrilega hár að ekki væri tækt á öðru en að menn yrðu dregnir fyrir dóm og sátt skapaðist um framtíðina, samfélagsleg sátt og traust.
Svo er Íslandsferð eftir nokkra daga júhú!!!

Á fyrsta farrými

2009-03-02T23:25:00.002+01:00

Um daginn var venjulega lestin sem ég tek ekki til taks. Í staðinn var notuð gömul einnar hæðar lest með gömlum innréttingum og klefum. Ég sá að það yrði margt fólk í lest og settist bara á fyrsta farrými í þessari gömlu lest þó að kortið mitt gildi bara fyrir annað farrými. Ég settist í klefa þar sem voru þrjú sæti sitt hvorum megin við ganginn. Ég tók upp tölvuna og horfði svo á allt fólkið fara fram hjá öllum tómu sætunum og yfir á annað farrými. Svo kom bráðlega snyrtilegur eldri maður í frakka og settist í eitt sætið í klefanum. Þetta var greinilega maður sem ferðast á fyrsta farrými. Og viti menn, þar sem við vorum "saman í félagi", þ.e.a.s menn sem ferðast á fyrsta farrými, þá vorum við á sömu hillu og maðurinn spjallaði aðeins við mig. Eftir margar lestarferðir er þetta í fyrsta skipti sem nokkur talar við mig í lestinni, þó að oftast sé nóg af fólki á öðru farrými. Svona auðvelt er að kaupa sig inn í félag ríkra, maður þarf ekki annað en að gefa sig út fyrir að eiga peninga - þá fær maður að vera með.
Baldur og Felix eru í heimsókn hjá mér þessa dagana. Þeir komu á fimmtudag. Felix var með laugardagsútvarpsþáttinn sinn í beinni héðan frá Amsterdam. Svo skruppu þeir til Leiden í gær þar sem Baldur verður með nokkra fyrirlestra við háskólann þar. Þeir koma svo aftur þaðan á morgun. Það var mjög gaman um helgina hjá okkur, borðaður góður matur, fórum í boð til Pierre og Mei, fórum út á lífið og svo framvegis.
Kv Pétur.

Sessunautur dauðans

2009-02-22T23:45:00.003+01:00

Fór á tónleika í kvöld þar sem Pollini, frægur píanisti, lék sónötur eftir Beethoven, Fantasíu eftir Schumann og Mazurka og Scherzo eftir Chopin. Var svo óheppinn að sitja við hliðina á manni sem var með óþolandi hávær öndunarhljóð. Það hljómaði eins og hann væri sofandi. Auk þess var öndunartíðnin hærri en eðlilegt mátti teljast. Ég neyddist til að bretta upp á vinstra eyrað til að brjálast ekki úr pirringi, við það lagaðist ástandið og gat ég notið tónleikanna eftir það. Reglulega eru tónleikar í þessu stóra tónleikahúsi í seríunni Meistarapíanistar. Sætin eru misdýr - ég hef oft verið seinn að kaupa mér miða og setið í ódýrari sætum þar sem útsýni er takmarkað, horfði til dæmis á bakið á píanistanum í dag, en það var svo sem allt í lagi. Fyrir aftan sviðið eru líka sæti og þeir sem sitja þar fremst, eiginlega á sviðinu næst píanistanum, eru sennilega einhverjir ríkir velgjörðarmenn tónleikahússins. Það eru gamlir menn með hvítt hár eða hár eins og silfurrefir. Menn sem minna á auðkýfinga og fyrirtækisforstjóra úr bandarískum bíómyndum. Við hlið þeirra sitja heldri eiginkonur með uppsett hár sem snúa sér við ef þær verða varar við óhljóð aftar í salnum. Þetta er fyrsta skipti sem ég fer á tónleika með Pollini þannig að ég var svolítið spenntur enda á ég nokkra uppáhaldsgeisladiska með honum. Auðvitað var þetta allt mjög fullkomið, sérstaklega Beethovensónöturnar. Fannst mér þó helst að Scherzó nr. 2 eftir Chopin hefði getað verið betra. Það hljómaði eins og hann væri búinn að spila þetta vinsæla verk milljón sinnum, það vantaði andagiftina og vissum smáatriðum virtist hann ekki gefa gaum. Kannski eru sum verk ekki ætluð eldri píanistum.

Svo las ég grein eftir Einar Má Guðmundsson, rithöfund, grein sem birtist í Morgunblaðinu í dag. Hann kemst oft svo vel að orði. Þessi klausa fannst mér til dæmis óborganleg: "Þingið er einsog draugskip þar sem framliðin áhöfnin heldur að hún sé enn í skemmtireisu. Eftir sautján ára stjórnarsetu tala Sjálfstæðimenn einsog þeir hafi bara ekki verið á svæðinu og viti ekki hvaða skelfingar þessi stjórnarstefna hefur leitt yfir þjóðina. Í fréttaskýringaþætti sjónvarpsins eru svæsnustu hægrikenningar, einsog þær að fjármálakreppan stafi af “undirmálslánum” í Bandaríkjunum, bornar fram sem sjálfsagður sannleikur. Takið eftir orðinu undirmálslán, hvernig það rímar við undirmálshópa. Í Bandaríkjunum er þessi skýring notuð til að skella skuldinni á minnihlutahópa en firra stjórnvöld Bushtímans ábyrgð. Afbrigði af þessari kenningu á Íslandi er sú að konan í Breiðholtinu sem keypti sér flatskjá hafi sett Ísland á hausinn, sem sé, að alþýðan geti sjálfri sér um kennt."

Rosalega mikið af fréttum

2009-02-21T20:57:00.002+01:00

Eða hitt þó heldur. Hef hugað í dag aðeins að ristilverkefninu. Næst á dagskrá er að skrifa grein um það hvort og með hvaða hætti ristilkrabbamein í hægri hluta ristils er öðruvísi en vinstra megin. Í sömu grein ætlum við að athuga hvort ristilkrabbamein er breytilegt eftir aldri. Hef verið með höfuðið í bleyti varðandi tölfræði og í samráði við tölfræðing er niðurstaðan sú að nota binary logistic regression. Þetta ristilverkefni hefur aukið töluvert við þekkingu mína á tölfræði sem var lítil fyrir.
Ég þarf að flytja stuttan fyrirlestur í næstu viku um forstig vissra krabbameinstegunda í eggjaleiðurum og tók með mér greinar heim til að vinna í þessu.
Eldamennskan hefur gengið betur frá síðasta slysi - gerði hina bestu súpu í kvöld, kjúklingabitar, laukur, sveppir, gulrætur og pastaskrúfur ásamt knorrdufti auðvitað. Núna varð engin olíusprenging.

Eldhústilraunir

2009-02-18T22:07:00.002+01:00

Mer tókst að óhreinka allt eldhúsið áðan. Tók loks út úr frystinum frystar kjúklingabringur í pakka - pakka sem er búinn að vera þar heillengi. Á pakkanum stóð að setja mætti bringurnar frosnar á pönnu og steikja á hvorri hlið við meðalhita í 5 mínútur. Ég gerði það auðvitað en brá heldur betur þegar ísinn utan á bringunni bráðnaði í hvelli, fór út í heita olíuna og sprakk síðan allsvakalega þannig að vatnsblandaðir olíudropar fóru út um allt eldhús. Eyddi ég dágóðum tíma í að hreinsa upp eftir spreninguna sem virtist standa óþarflega lengi. Að lokum steikti ég svo bringurnar samkvæmt leiðbeiningunum og reyndust þær mjög góðar. Reynslunni ríkari ætla ég að gera aðeins öðruvísi þegar ég steiki hinar bringurnar úr pakkanum.
Kv Pétur.

London

2009-02-15T23:14:00.002+01:00

Heimsótti Garðar bróður í London um helgina. Fór þangað síðastliðið föstudagskvöld eftir vinnu. Þurfti reyndar að skilja ýmislegt óklárað eftir á borðinu enda var föstudagurinn mjög annríkur. Það vakti athygli mína að ferðin með metró frá Heathrow heim til Garðars tók jafnlangan tíma og flugið milli Heathrow og Schiphol. Í London var ýmislegt gert, m.a. fórum við upp í turninn á dómkirkju St. Pauls og á safn Sir John Soane. Það var mjög áhugavert safn. Um er að ræða heimili þekkts arkitekts sem sem breyttist í safn um leið og hann féll frá á fyrri hluta 19. aldar. Hann safnaði fornmunum og raðaði þeim upp á óvenjulegan hátt - svo var hann með múmíulíkkistu í kjallaranum. Mér skilst að hann hafi haldið stórt partí þegar líkkistan var komin ofan í kjallara. Svo hittum við Jakob og Augusto sem hafa það mjög gott í London. Fór líka á Sushi stað með Garðari. Matur á góðum sushi-stað í London er eiginlega orðið að góðri venju.

Þetta viðtal við Geir H Haarde í breska þættinum Hardtalk var merkilegt að ýmsu leyti. Í fyrsta lagi hef ég ekki séð íslenskan stjórnmálamann vera spurðan út úr með þessum hætti. Geir átti í þessum þætti engrar undankomu auðið og gat ekki svarað með skætingi eða snúið út úr eins og maður sér í íslenskum fréttum. Í öðru lagi fannst mér merkilegt að Geir skyldi ekki hafa talað við Gordon Brown eftir að hryðjuverkalögin voru sett á Ísland. Varðandi fyrra atriðið þá held ég að íslenskir fréttamenn séu oft í þeirri erfiðu stöðu að ef þeir eru í ónáð hjá stjórnmálamanni, t.d. vegna erfiðra spurninga, þá fá þeir að gjalda fyrir það, t.d. með því að fá síður að bera upp spurningar. Breski fréttamaðurinn hafði engra hagsmuna að gæta varðandi framtíð sína í fréttamennsku og gat því spurt alls. Þetta var alveg nýtt fyrir mér.

Hvað gerðist?

2009-02-09T23:13:00.004+01:00

Það er merkilegt að lesa skýrslu Gylfa og Jóns, hagfræðinga, um hrun íslenska hagkerfisins (http://www.riskresearch.org/). Svo virðist sem einstakt hrun hafi átt sér stað á Íslandi og ólíklegt er að nokkuð þessu líkt komi til með að eiga sér stað t.d. í Bretland þó að þar kunni af koma allnokkur lægð. Margt af því sem þarna kemur fram hefur komið fram áður með einum eða öðrum hætti en þarna er ágæt samantekt á málinu. Þessi skýrsla sannfærir mig um að nauðsynlegt sé að skipta út fólki í íslensku stjórnkerfi sem átti hlut að málum. Það sem er svo ótrúlegt er hversu meingallað íslenskt stjórnkerfi var og er - það er miklu lélegra en mér hefði nokkurn tímann dottið í hug. Þrátt fyrir að kerfið hafi verið jafnlélegt fyrir 10 árum og það er nú þá er samt magnað til þess að hugsa að staða Íslands þá var ótrúlega góð í alþjóðlegu samhengi. Aðeins á tæpum 10 árum var þessu rústað. Hið jákvæða í þessu er að hrunið getur orðið til þess að lög og reglur á Íslandi verði endurskoðaðar og betrumbættar þannig að flokkshagsmunir og spilling lágmarkist og lýðræði og jafnrétti aukist.

Annars er það að nefna að ég skrapp á tónleika í gærkvöldi. Það var Alexander Gavrylyuk, ungur píanisti sem lék skemmtileg verk eftir Mozart, Brahms, Rachmaninov og Bach. Ég keypti miða á síðustu stundu og fékk sæti aftast uppi á sviði við hliðina á orgelinu. Gat hallað mér til hliðar og fram og sá þá aðeins. Það var gaman hversu duglegur hann var að spila aukalög, eftir smá klapp skellti hann sér í næsta og næsta verk. Dagurinn var frekar erfiður. Það voru tvær krufningar ofan á aðra vinnu. Annar sjúklingurinn var með rosalega ásvelgingslungnabólgu - annað eins hef ég ekki séð.

Pétur.

Ögmundur tekur lækna fyrir

2009-02-07T19:59:00.008+01:00

Fór á bíó í gær. Sá myndina Milk sem fjallar um réttindabaráttu samkynhneigðra í Kaliforníu á sjöunda og áttunda áratugnum. Fín mynd, vel leikin. Sem Íslendingur gerir maður auðvitað ráð fyrir að geta greitt með korti fyrir bíómiðann en auðvitað var það ekki hægt. Ekki er hægt að borga fyrir alls kyns afþreyingu, veitingar og mat hér í Amsterdam nema með beinhörðum peningum. Ég geri ráð fyrir að þetta sé sparnaðarráðstöfun en Íslendingar eru mun lengra komnir með að nota bara kort, sem mér finnst miklu þægilegra.

Í dag frétti ég að hinn nýi heilbrigðisráðherra hafi mikinn áhuga á því að spara í heilbrigðiskerfinu með því að lækka laun lækna. Þetta fann ég á heimasíðu Ögmundar:

"Langskólamenntað fólk verður að skilja að menntun er ekki og á ekki að vera óskilyrt ávísun á miklu betri kjör en þeir njóta sem búa yfir minni skólamenntun." Svo skrifaði Ögmundur: "Sjálfsagt er að taka viðmið af kostnaði vegna námslána. Lengra nær mín samúð ekki. Vissulega á heilaskurðlæknirinn að hafa bærileg laun. En það gildir líka um starfsmanninn sem hjálpar ósjálfbjarga einstaklingi að komast í gegnum daginn - og nóttina, þótt sá hafi ekki jafnlangt nám að baki og hinn sem mundar skurðhnífinn.
Menntun segir ekki allt um gildi starfa. Þá síður um hve erfið störf eru eða þakklát. Hrokatal er "menntafólki" eða "prófgráðufólki" hvorki til sóma né er það því til framdráttar. Það vita þeir sem best eru menntaðir - og upplýstir. Þeir tala af hógværð. Þeir vita hvers virði réttlátt þjóðfélag er. Kannski er það í þessu sem munurinn liggur á menntamanni annars vegar og prófgráðumanni hins vegar."

Svo kom fram á visir.is: "Ögmundur sagði að niðurskurður í heilbrigðiskerfinu væri óhjákvæmilegur. Hann hefði hins vegar reynt að setja sér skýr markmið í þessum niðurskurði. Reynt yrði að draga ekki úr aðgengi sjúklinga. Reynt yrði að láta þetta ekki bitna á starfsfólki og reynt yrði að hlífa því starfsfólki sem hefði lágar tekjur og miðlungstekjur á kostnað þeirra sem bera mikið úr býtum."

"Reynt yrði að láta þetta ekki bitna á starfsfólki (...) á kostnað þeirra sem bera mikið úr býtum." Er ekki mótsögn í þessari setningu? Ég held að það sé að minnsta kosti þrennt sem Ögmundur áttar sig ekki á. Í fyrsta lagi á því að það verður helst að vera einhver umbun fyrir að leggja á sig langt nám, mikla vinnu og ábyrgðarmikið starf - fólk vill vera metið að verðleikum. Í öðru lagi að eftir langt nám og sérnám eru læknar "gamlir" þegar þeir byrja að geta lagt fyrir og þegar læknar fara á eftirlaun hefur hver króna verið skemur í ávöxtun en hjá þeim sem byrja fyrr að vinna. Í þriðja lagi getur sú staða komið upp að íslenskir læknar vilji síður fara til Íslands að sérnámi loknu séu kjörin orðin töluvert lélegri en það sem erlendis býðst. Ögmundur er fullur af hugmyndum sem ég hef áhyggjur af.

Ljósmynd í líkkistu

2009-01-31T13:44:00.002+01:00

Í gærkvöldi lét ég taka mynd af mér í líkkistu. Við Ásgeir höfum kynnst fólki í listabransanum sem stendur fyrir ýmsum viðburðum. Einn slíkur viðburður var opnaður í gær, kallast "Ik R.I.P." (http://www.facebook.com/home.php?#/event.php?eid=41641754430). Þar voru myndir af látnu fólki og líkkistur frá Ghana m.a. í formi kókflösku, bangsa, krabba og Nike-skós. Svo var einhver mjög fríkaður tónlistarmaður og hægt var að fara í tölvuleik þar sem maður átti að láta gamla haltrandi konu ganga að næsta bekk þar sem hún dó eftir að hún hafði setið þar í smá stund og hlustað á lag ("Grand Theft Granny", eða hitt þó heldur). Svo gat fólk látið taka mynd af sér í lokaðri líkkistu, mynd sem var svo sett inn á netið (prófíl sem ég þarf að virkja við tækifæri). Hugmyndin er að fá fólk til að huga að því hvað verður um prófíla fólks á netinu eftir að það fellur frá. Á þessari nýju síðu getur maður svo fengið einhvern til að sjá um prófílinn eftir að maður fellur frá þannig að síðan hverfi ekki, eins og gerist víst t.d. á Facebook þar sem prófílar hverfa eftir ákveðinn tíma ef enginn hreyfing verður.
Í morgun skrapp ég á pósthúsið og sótti þar pakka fyrir Ásgeir. Hér þarf að framvísa skilríkjum þegar maður sækir hluti á pósthúsið og ég neyddist til að þykjast vera Ásgeir, bar mig aumlega og sagðist hafa gleymt skilríkjunum heima. Ótrúlegt en satt, tókst það. Það var líka eins gott því að þetta er eitthvað sem Ásgeir þarf fyrir sýninguna sem hann er að undirbúa og fer til Íslands á morgun.
Þá græjaði ég loks lásinn á hjólinu hans Ásgeirs. Einn þriggja lása var ónýtur og ekki unnt að opna hann. Dröslaði ég hjólinu á verkstæði þar sem lásinn var sagaður í sundur. Þá keypti ég fínan lás sem kostaði reyndar helmingi meira en hjólið sjálft (sem fékkst mjöög ódýrt um árið)!

Kveðja, Pétur.

Janúar

2009-01-28T19:16:00.003+01:00

Þá er janúarmánuði alveg að ljúka. Ásgeir, sem er nú á Íslandi fram á vor til að klára BA í dansi við Listaháskólann, kom reyndar hingað um daginn og var hér í tvær vikur til að semja dans. Það verður mikið að gera hjá honum næstu vikurnar, hann þarf að klára að semja dansinn og flytja hann (eitt af lokaverkefnunum við skólann) auk þess sem hann þarf að skrifa BA ritgerð. Svo ætla ég til Íslands eina langa helgi fyrri hluta marsmánaðar þegar þessum hasar er lokið og heimsækja Ásgeir.
Við Ásgeir höfðum það gott hér; fengum gesti í mat, horfðum á vídeó og fórum út. Ásgeir lagaði líka þráðlausa netið (sem skaddaðist er dagbók nokkur datt á boxið) sem er mikill munur. Við ætluðum í bíó eitt kvöldið en sáum þá að það voru komnir tveir þættir af Lost, fimmtu seríu, á netið þannig að við horfðum á Lost í staðinn enda forfallnir aðdáendur. Ýmislegt kom strax í ljós, þetta verður æ meira spennandi.

Það er nóg að gera í vinnunni eins og endra nær. Kom samt frekar snemma heim í dag. Þarf að rumpa af fyrstu greininni um ristilkrabbameinið sem birtist vonandi sem fyrst í Læknablaðinu. Af áhugaverðum sýnum í vinnunni hef ég séð papillary cystadenoma í eistalyppu, lymphoma í ristli, synoviitis villonodularis pigmentosa í fingri og intraosseous ganglion í sköflungi, svo eitthvað sé nefnt. Það hafa líka verið margar krufningar undanfarið, þar hef ég séð hjartaþelsbólgu, iliopsoas hematoma, iliac artery thrombosis og coecal blowout með faecal peritonitis í tengslum við proximal tumorstricturu.

Svo kemst ég varla hjá því að minnast á stjórnmál og efnahagsmál á Íslandi. Það hefur verið fjallað um þetta í hollenskum fjölmiðlum og kona í vinnunni kom að máli við mig og sagði að þetta væri svo skrýtið, áður hafi aldrei verið fjallað um Ísland en nú væri landið oft í fréttum. Þegar mótmælin stóðu sem hæst fyrir utan Alþingishúsið sagði einn við mig að það væri greinilega ekki gáfulegt að reita víkinga til reiði! Ég vona bara að ástandið nái að róast aðeins og stjórnmálamenn einbeiti sér að efnahagsástandinu en ekki flokkapólitík. Vonandi verða kosningar ekki of snemma. Þá ná grasrótarhreyfingar að stofna flokka - enda ekki vanþörf á. Ég kysi ekki neinn af þeim flokkum sem nú er boðið upp á. En hvernig ætli það sé með þá sem búa erlendis? Ég flutti lögheimilið til Hollands, get ég samt kosið og hvernig? Ég þarf að athuga það.

Kv. Pétur.

Ís á síkjunum

2009-01-06T22:51:00.004+01:00

Það svo kalt hérna að það er kominn ís á síkin í Amsterdam. Ef kuldinn helst verður ísinn nógu þykkur til að fólk geti farið á skautum í vinnuna. Í dag fór fólk fyrr úr vinnunni til að renna sér á skautum. Skautaíþróttin er vinsæl í Hollandi og í hvert skipti sem frystir vaknar sú spurning hvort hægt verði að halda stóru skautakeppnina. Þá þarf að frysta kringum stóra eyju einhvers staðar fyrir norðan Amsterdam. Þessi keppni var síðast haldin 1997 en ekki síðan þar sem kuldinn hefur ekki haldist nógu mikill og nógu lengi.
Svo var ég í ræktinni áðan. Þar eru Hollendingar ólíkir Íslendingum a.m.k. að tvennu leyti. Annað er að margir eru sjálfskipaðir kennarar og vilja gjarnan koma með ábendingar um það sem betur mætti fara. Hitt er að þeir taka stundum nokkur dansspor við tónlistina. Einn tók langa syrpu fyrir framan spegilinn um daginn. Þeir eru ekkert feimnir við það.
Kv. Pétur.

Jólafríi lokið

2009-01-04T22:04:00.002+01:00

Nú er jólafríinu lokið, ég kom til Amsterdam í dag. Eitt það fyrsta sem ég tók eftir er heim var komið var húskuldinn. Reyndar hafði íbúðin ekki verið hituð upp í 2 vikur en húsnæði á Íslandi er samt áberandi hlýrra en hér í Amsterdam. Hér er aðeins einn ofn (gasofn) í allri íbúðinni.
Við Ásgeir höfðum það mjög gott í jólafríinu. Fyrri tvær vikurnar vorum við hjá foreldrum mínum en seinni tvær hjá foreldrum Ásgeirs. Ásgeir varð svo eftir á Íslandi því að þar ætlar hann að vera fram í maí til að klára BA gráðuna sína í dansi.
Stóran hluta jólafrísins vorum við í fjölskylduboðum eða heimsóknum. Við fengum alls staðar góðan mat. Ég tók því rólega til að byrja með en þegar leið undir lok jólafrísins varð ljóst að ég næði ekki að hitta alla sem mig langaði til að hitta og suma hitti ég aðeins í mýflugumynd.
Ristilrannsóknin tók líka sinn toll. Þó að rannsókninni sé í raun lokið þarf að skrifa þetta upp fyrir læknatímarit. Þetta verða nokkrar greinar, sú fyrsta verður væntanlega birt í Læknablaðinu. Ég tala um að rumpa þetta af en Ásgeir talar um að rumpa í ristilinn, hvað sem það nú þýðir.
Þegar komið var til Amsterdam í dag gerðist ég duglegur og tók til, gekk frá jólaskrauti, þvoði tvær þvottavélar, setti meira að segja bókhaldsgögn í möppu og fór út í búð. Nú er allt tilbúið fyrir vinnuvikuna sem hefst á morgun.
Kveðja, Pétur.

Á leið til Íslands

2008-12-20T17:53:00.002+01:00

Við Ásgeir komum til Íslands á morgun. Upp á síðkastið höfum við átt í nógu að snúast. Það voru sýningar hjá Ásgeiri vítt og breitt um Holland síðustu vikuna. Við höfum keypt jólagjafir. Það var jólapartí í vinnunni minni og loks nú loks jólafrí. Það er strax komin vísir að þéttri dagskrá um og fram að jólum, strax veisla annað kvöld. Sjáumst á Íslandi. Pétur.

Sinterklaas og svarti Piet

2008-12-07T12:31:00.005+01:00

Núna um helgina, nánar tiltekið 5. desember, gaf Sinterklaas í skóinn hér í Amsterdam. Þá fá hollensku börnin gjafir og nammi og allir flýttu sér heim úr vinnunni á föstudaginn. Gjafajólin fara því mun fyrr fram hér en heima og útsölurnar byrja hér eftir rúma viku. Sinterklaas kemur samt aðeins fyrr til Hollands, þ.e. 15. nóvember á skipi sínu frá Madríd ásamt þrælunum sínum, zwarte Pieten (svörtu Pétrarnir). Það eru svertingjar sem munu reyndar upprunalega hafa verið sótarar. Þeir hafa nammipoka til að gefa börnunum. Svo kemur Kerstmann (lesist Kólasveinninn) 24. desember og þá er mun minna um gjafir. Ásgeir fékk frá Sinterklaas nærbuxur og kökukefli. Ég fékk líka nærbuxur. Í dag verður hér smá jólabakstur. Við erum með jólatónlist á fóninum. Hún er merkileg sú íslenska formúla að taka ítölsk popplög og breyta í jólalög.

Ég var að horfa á Silfur Egils áðan. Manni blöskrar hversu lélegt regluverkið er í íslenskum viðskiptum; allt má og ekkert er saknæmt, spilling er leyfð. Það eru stjórnmálamenn sem gerðu þetta kleyft, þar á vandamálið uppruna sinn. Nú þarf bæði að koma ónýtum stjórnmálamönnum og lagsmönnum þeirra frá og laga stórkostlega gallað regluverk sem þeir hafa skapað. Ég óska þess að sjá hæft fólk stíga fram, hverjir verða það?

Kveðja, Pétur.

Bloggað

2008-12-06T13:57:00.003+01:00

Tvær vikur þangað til við komum heim, hlökkum mikið til. Ásgeir á núna eftir 7 sýningar af verkinu Sloth. Ein verður í kvöld, nánar tiltekið í bænum Purmerend. Svo er Ásgeir byrjaður að undirbúa einstaklingsverkefni og BA-ritgerð fyrir vorið en þá verður hann á Íslandi til að klára BA-gráðuna í dansi.

Við fórum á sýningu í gær. Það var verk þar sem öll sýningin var þannig að leikararnir sex komu fram á sviðið í "slómó" til að hneigja sig líkt og eftir sýningu. Á meðan því stóð sögðu þeir þær hugsanir sem fóru um hugann. Alveg í lokin endurtóku þau hreyfingarnar á eðlilegum hraða, það tók 2 mínútur.

Hjá mér hefur verið mikið að gera í vinnunni, hef komið seint heim. Sem betur fer hafa nokkur áhugaverð tilfelli dúkkað upp inn á milli rútínunnar, man í svipinn eftir atypical fibroxanthoma og smáfrumukrabbameini í brjósti. Annars var óvanaleg krufning í vikunni, einstaklingur sem hafði látist fyrir 2 vikum í Tælandi og líkið þar smurt en ekki flutt til Hollands þar sem flugsamgöngur til og frá Tælandi voru í lamasessi vegna mótmælanna þar. Formalínlyktin var mjög sterk og rotnun merkilega lítil, sem betur fer.

Kv. Pétur.

Jólaföndur og tónleikar

2008-11-30T23:26:00.002+01:00

Við erum komnir í mikið jólaskap. Ásgeir skipulagði "jólaföndur og dúllerí" og hingað komu ýmsir gestir í dag, drukku heitt súkkulaði, borðuðu hollenskt jólabakkelsi og föndruðu. Gömul handtök voru rifjuð upp, músastigar, jólahjörtu og ýmsilegt fleira. Íslensk jólatónlist hefur ómað allan daginn.

Svo fór ég á píanótónleika í kvöld í Het Concertgbouw að hlusta á Evgeny Kissin, rússneskan píanista. Það er gaman að fara í þetta stóra tónleikahús. Það er frá 19 öld, er skrautlegt en stílhreint. Úr loftunum hanga kristalsljósakrónur, teppin eru rauð og flúr á veggjum. Á veggjunum fyrir utan salinn hanga málverk af listamönnum og inni í salnum má lesa nöfn gömlu tónskáldanna á veggjunum. Kissin spilaði verk eftir Prokofief og Chopin. Fólk átti erfitt með að halda aftur að sér að klappa ekki á milli einstakra Chopin-etýða. Í lokin var hann klappaður margoft upp. Eins og endra nær eftir tónleika segi ég nú við sjálfan mig að ég verði að fara oftar á tónleika. Svo langar mig til að spila sjálfur, hef nú ekki spilað á píanó lengi. Reyni að kippa því í liðinn sem fyrst.

Kveðja, Pétur.

Matarmiðar á LSH og klósettin í lestunum

2008-11-29T20:02:00.006+01:00

Ég var að taka til í veskinu í vikunni. Það kom mér verulega á óvart að finna þar 10 matarmiða af Landsanum, meira en ári eftir að ég flutti hingað til Hollands. Ég held að ég skelli mér bara í hádegismat á LSH þegar ég kem heim til Íslands nú um jólin.

Svo er annað merkilegt sem ég komst að nýlega. Ég var staddur á aðallestarstöðinni þegar ég sá vatngusu koma neðan úr einni lestinni niður á teinana. Mig grunaði strax hvað væri í gangi og staðfesti kenningu mína í næstu lestarferð. Klósettúrgangurinn fer beint niður á lestarteinana! Þá kom upp úr dúrnum að mælst er til þess að maður noti ekki lestarklósettin þegar lestin er stopp á lestarstöðvunum. Síðan þá hef ég séð leyfar af hægðum á teinunum inni á miðri lestarstöð. Samt er engin lykt.

Við vorum að fá nýtt sjónvarp og ný hljómflutningstæki. Leigusalinn okkar kom með þetta í dag, honum fannst þau tæki sem hér voru orðin of gömul. Þetta eru rosalega fín tæki.

Við héldum upp á þakkargjörðardaginn síðastliðinn fimmtudag og hittum vini okkar hér í Amsterdam og borðuðum kalkún. Þetta voru um 20 manns, allt útlendingar hér í Hollandi, sem hittust að frumkvæði Ali sem kemur frá Bandaríkjunum. Við Ásgeir komum með sætar kartöflur. Maturinn var frábær.

Kveðja, Pétur.

Sigurrósartónleikar og fleira

2008-11-23T22:55:00.002+01:00

Við Ásgeir fórum á Sigurrósartónleika hér í Amsterdam í síðastliðinni viku. Það var húsfyllir í stórum tónleikasal og löngu uppselt. Tónleikarnir voru mjög góðir. Ég hef þrívegis áður séð Sigurrós á tónleikum en ætli þessir hafi ekki verið bestir. Það var reyndar eitthvert hljóðvandamál í byrjun, hollenski hljóðmaðurinn gerði einhverja vitleysu og Jónsi ýjaði stuttlega að því á íslensku í hátalarann - en auðvitað skildi hljóðmaðurinn ekki hvað hann var að segja.

Ásgeir skrapp í dag til Brussel til að fara á nokkurra daga dansnámskeið og hitta vini sem þar búa. Brussel er mikil mekka í nútímadansi og reyndar stutt og ódýrt að fara þangað með lest. Ég er því einn hér heima - í hálfgerðum kulda því að íbúðin okkar er gömul og illa einangruð, ofninn er samt á fullu. Hér er einfalt gler og kalt loft kemst milli lista.

Ég hef fylgst frekar hissa með fréttum af mótmælum fyir utan lögreglustöðina. Það fólk sem ég hef heyrt í finnst mótmælin gegn handtökunni hafa gengið of langt.

Í gær fór ég á námskeið í meinafræði lungnasjúkdóma, nánar tiltekið svokallaðra interstitial lungnasjúkdóma, sem eru frekar óalgengir. Þetta var fínn kúrs, skipulagður fyrir unglækna í meinafræði. Svo fórum við Ásgeir um kvöldið í mat til Önnu Þóru og kærasta hennar James.

Annars er ekki fleira í fréttum. Ný vinnuvika hefst á morgun.

Kveðja, Pétur.

Danssýningar hjá Ásgeiri

2008-11-16T15:24:00.004+01:00

Í gærkvöldi fór ég á eina nokkurra sýninga hér í Amsterdam á verkinu Sloth sem Ásgeir dansar í. Danshópurinn varð fyrir því bakslagi að einn dansaranna sneri sig illa á ökkla og því var nýr dansari kallaður til með 2 daga fyrirvara. Þrátt fyrir þetta hafa sýningarnar gengið vel og það var gaman að sjá hvernig verkið hafði þroskast frá frumsýningu. Hér gistu hjá okkur í nokkrar nætur 2 stelpur úr danshópnum, þær Katja og Estelle. Í gærmorgun og í morgun var því mannmargt við morgunverðarborðið, gerðar vöfflur og hrærð egg.

Af vinunni er það að frétta að þar hefa verið ósættir milli meinafræðinganna og yfirmannsins og það hafa verið ítrekaðir fundir á vinnutíma. Ég veit ekki hvað þetta snýst um en það virðist engin lausn í sjónmáli. Það þykir mér miður því að þetta truflar vinnuna. Sá meinafræðingur sem ég átti að vinna með síðastliðinn fimmtudag hafði t.d. engan tíma þann daginn til að skoða með mér það sem skoða skyldi og var því vinnan næsta dag helmingi meiri fyrir vikið. Áhugaverðasta sýnið í vikunni var hóstarkirstilsæxli (thymoma). Annað var vanalegt.

Nú er indónesíski vinur okkar, Herbert, farinn til síns heimalands eftir að hafa gefist upp á að fá atvinnuleyfi hér. Það þykir okkur leitt því að við þekkjum ekki svo marga hér. Annars var gaman í gær því að á sýningu gærkvöldsins komu margir Íslendingar. Ætli maður þurfi að halla sér meira að Íslendingunum hér í borg?

Ég fékk frest hjá skattinum vegna skattskýrslu fyrir 2007 og sendi allt draslið til endurskoðanda sem ætlar að sjá um málið. Er miklu fargi þar með af mér létt.

Kveðja, Pétur.

Ný símanúmer

2008-11-07T17:01:00.004+01:00

Elsku ættingjar og vinir, nær og fjær.

Hér í Amsturdammi þarf maður líka að spara og þess vegna höfum við ákveðið að skipta um símafyrirtæki. Núna erum við í bissness við LycaMobile. Lyca er voða gott fyrir þá sem þurfa að hringja löng kreppu- og bankatengd símtöl til Íslands. Svo hringjum við frítt hvor í annan.

Nýju númerin okkar eru:
Ásgeir - 00 31 6 3420 5589
Pétur - 00 31 6 3420 5598

Kveðja, Ásgeir.

Hollensk fórnarlömb íslensku kreppunnar

2008-11-06T22:30:00.006+01:00

Það er lítið fjallað um ástandið á Íslandi í hollenskum fjölmiðlum þessa dagana. Einstöku greinar hafa þó birst um Icesave-málið. Þeir sem áttu pening á Icesave-reikningunum fá allt að 100.000 evrur greiddar (þar af 20.000 evrur frá Íslandi). Þeir einstaklingar sem áttu meira en 100.000 evrur voru um það bil 470 talsins. Þeir hafa stofnað félag og ætla að senda fulltrúa sinn til Íslands til að huga að þessum málum. Í gær birtist í Metró (eins konar Fréttablað) viðtal við 52 árs gamlan hjúkrunarfræðing sem átti meira en 100.000 evrur á Icesave-reikningi og lagði peninginn þar inn síðastliðið sumar. Hún er barnslaus og hafði á löngum tíma náð að nurla saman fé með því að starfa sem hjúkrunarfræðingur, taka að sér yfirvinnu og spara. Þetta var eins konar eftirlaunasjóður sem hún ætlaði að nota til að geta hætt fyrr að vinna, eiga náðugt ævikvöld og til að eiga fyrir umönnun á efri árum. Í októberbyrjun var fótunum kippt undan henni og sagðist hún aldrei hafa grátið jafnmikið og síðastliðinn mánuð. Allt í einu átti hún ekkert nema tæpar 100 evrur til að hafa í sig og á, restin var á Icesave-reikningnum. Tilfinningin væri eins og stolið hefði verið af henni og skilningur fólks á þessu væri lítill.
Aðrar sögur af Icesave-fórnarlömbum hafa einnig birst en ég ætla ekki að tíunda þær. Hvað varð eiginlega um allan þennan pening sem fór inn á Icesave-reikningana?

Annars er það að frétta að ég fékk frest til að skila inn skattskýrslunni. Annars hef ég illan bifur á hollenska skattinum. Reglurnar hér eru öðruvísi en á Íslandi. Þeir skatta t.d. líka höfuðstólinn, ekki bara vextina. Skattleysismörk eru 20.000 evrur. Þannig má búa til dæmi um einhvern sem á 100.000 evrur á vaxtalausum gíróreikningi. Þar minnkar féð árlega með skattheimtu ríkisins. Ríkið gerir ráð fyrir því að hver og einn hafi vit á því að geyma fé þannig að ávöxtun fáist.

Ég hef séð nokkur áhugaverð tilfelli á síðustu vikum í vinnunni: glomangioma, synovial chondromatosis, neuroendocrine carcinoma í smágirni, canalicular adenoma í munnvatnskirtli, extramammary Pagets disease á handarbaki, pigmented villonodular synoviitis, Spitz naevus, lentigo maligna, xanthogranulomatous pyelonephritis og pyonephrosis og aneurysma á kransæð.

Kveðja, Pétur.

Datt og missti af lestinni

2008-11-03T19:00:00.002+01:00

Í morgun var ég tæpur á tíma og þegar ég var kominn upp á adallestarstöd hafdi ég 2-3 mínútur til ad komast í lestina, sem ég vissi ad væri hægt. Ég yrdi adeins ad vera fljótur. Ég hélt á tveimur plastpokum med möppum og pappír sem ég þurfti ad fara med í vinnuna. Ég hljóp eins og fætur togudu, inn gangana, fram hjá fólkinu, upp tröppurnar thar sem sé ég glitta í lestina og ... Í efsta þrepinu skreikadi mér einhvern veginn fótur og ég datt á hlaupunum. Ég hlammadist fram fyrir mig nidur á brautarpallinn, annar pokinn rifnadi og pappír dreifdist um stéttina. Í ofbodi reyni ég ad taka saman pappírinn og næ því mjög fljótlega en í þann mund heyrist flaut og dyrnar á lestinni lokast. Thetta var eiginlega eins og í bíómynd. Ég missti af lestinni.

Frumsýning og slóttugir leigubílstjórar

2008-11-02T00:16:00.003+01:00

Ýmislegt hefur verið á döfinni hjá okkur Ásgeiri. Það er helst að frétta að Katrín, dansnemi, var í heimsókn frá Salzburg og loks var verkið sem Ásgeir dansar í frumflutt. Frumsýningin fór fram í den Haag, fyrsta af 20 sýningum, og tókst mjög vel. Verkið heitir Sloth (leti) og nefnist svo eftir einni höfuðsyndanna sjö. Hver dansari hefur vissan karakter, t.d. er Ásgeir maður sem er ávallt með háleitar hugmyndir og yfirlýsingar en síðan gerist aldrei neitt. Áður hefur sami danshöfundur samið verk í þessari seríu, m.a. Matgræðgi.

Eftir sýninguna komum við seint með lestinni til Amsterdam frá den Haag og metró var hættur að ganga. Þá var fátt annað í stöðunni í kuldanum en að taka leigubíl. Það er nokkuð sem mér er meinilla við því að leigubílstjórar í Amsterdam, aðallega þeir sem bíða á aðallestarstöðinni, eru þekktir fyrir að svindla á ferðalöngum. Við settumst inn í leigubíl og sögðum hvert við vildum fara. Hann neitaði að setja mælinn af stað og vildi bara ákveðið gjald, þ.e. 8 evrum meira en eðlilegt taldist. Svo sagði hann að við gætum bara farið út og reynt að finna ódýrari leigubíl. En það er vonlaust því að bílstjórarnir á aðallestarstöðinni standa saman eins og dæmi hafa sannað. Á endanum tókum við fjárans leigubílinn á verði sem var tæpum 6 evrum of hátt. Það er athyglisvert að leigubílstjórarnir á aðallestarstöðinni virðast allir aðfluttir frá sama landinu í Afríku. Þetta er óþolandi ástand og maður skilur ekki af hverju ekkert er gert í þessu. Aldrei tek ég aftur leigbíl þarna.

Svo kom Herbert í mat í kvöld. Hann er einn fárra vina okkar hér í Amsterdam og kemur frá Indónesíu. Hann hefur búið hér í rúmt ár og ég kynntist honum á hollenskunámskeiðinu í september í fyrra. Hann notaði allan síðastliðinn vetur til að læra hollensku og hefur allt þetta ár reynt að fá vinnu á sínu sviði, þ.e.a.s. einhvað lögfræðitengt (t.d. svokallaður aðstoðarmaður lögfræðings, paralegal). ESB-löggjöfin er hins vegar stíf þannig að ef enginn vill ráða hann á vissum lágmarkslaunum þá fær hann ekki að setjast að. Og nú er staðan orðin sú að hann verður að flytja aftur til Indónesíu.

Kveðja, Pétur.

Skattskýrsla, garg

2008-10-28T00:42:00.002+01:00

Ég er búinn að komast að því að ég get ekki gert þessa skattskýrslu fyrir 2007 sjálfur. Það er of mikil hætta á að einhver villa verði til tvísköttunar eða slíks og mörgum spurningum er ósvarað sem enginn sem ég þekki kann svar við. Og erfitt er að vinda ofan af slíku. Á föstudaginn var sagði einhver hundleiðinlegur karl hjá skattinum að ég gæti ekki fengið frest. Svo hringdi ég aftur í dag og þá var það hægt, ég þyrfti bara að senda inn beiðni. Nú er bara að vona að ég fái frestinn. Í sambandi við óskilvirka skriffinsku er skattskýrslan sem ég þarf að fylla út aðeins til á pappírsformi og það tekur 6-8 vikur að fá nýja skýrslu en ég óskaði eftir því þar sem ég hef fyllt upprunaleug skýrsluna að hluta vitlaust út.

Annars var verst að komast að því að ég hefði e.t.v. getað sleppt því að senda inn skattskýrslu til að byrja með þar sem ég vinn á sjúkrahúsi og borga skatt strax. Nú er skatturinn hins vegar búinn að vasast í þessu og þá verður ekki aftur snúið.

Xavier var í heimsókn hjá okkur um helgina. Það var mjög gaman að fá hann í heimsókn. Við skoðuðum aðeins borgina og næturlífið.

Svo var enn einn langi vinnudagurinn í dag, var að til klukkan 22.

Kveðja, Pétur.

Skattskýrslan framhald

2008-10-22T21:00:00.002+02:00

Ég var rosalega sniðugur í dag. Illa gekk að skilja allar spurningarnar í skattskýrslunni en ég greip áðan á það ráð að fá ókunnugan Hollending í lestinni til að hjálpa mér. Meira að segja hann skildi ekki allar spurningarnar!! Annars gekk þetta vel, á 40 mínútum fórum við í gegnum um helming spurninganna.

Skattskýrslan

2008-10-21T22:22:00.002+02:00

Eihvern tímann í sumar tókst mér að skila loks inn hollensku skattskýrslunni fyrir 2007, löngu á eftir áætlun. Það var leiðinlegt verk sem hafðist á endanum. Nú er ég búinn að fá bréf frá skattinum þar sem kemur fram að ég hefi fyllt út vitlausa skýrslu þar sem ég bjó ekki allt árið í Hollandi. Garg. Fékk senda skýrslu, tugi blaðsíðna, sem ég þarf að fara í gegnum og svara. Verst er að ég hnýt um svo margt, tekur allt of langan tíma.
Kveðja, Pétur.

Arnhem og flugmiðar

2008-10-16T21:43:00.002+02:00

Ég er búinn að kaupa flugmiða til Íslands um jólin, náði að kría út 2 vikna frí og kem 21. desember. Ég keypti flugmiða með flugpunktum. Það er ekki í frásögur færandi nema að flugvallarskattar, eldsneytisgjald og skráningargjald var nærri 25.000 krónur!
Við Ásgeir ætlum að dvelja í Arnhem næstu helgi, lítilli borg fyrir sunnan Amsterdam. Þar æfir dansflokkurinn hans Ásgeirs og við verðum með herbergi í íbúð dansflokksins. Á hverjum degi förum við Ásgeir hvor í sína áttina til vinnu, ég í norður til Alkmaar og hann í suður til Arnhem. Ferðalagið tekur mig um klukkutíma og 10 mínútur. Mér líka vel að sitja í lestinni og lesa eitthvað. Ég er farinn að lesa hollensku blöðin. Icesave-reikningarnir voru á forsíðu blaðanna í dag því enn berast fréttir af tapi sveitarfélaga og halda menn að þar séu ekki enn komin öll kurl til grafar. Maður spyr sig óneitanlega hvað varð um alla þessa peninga sem lagðir voru inn á Icesave-reikningana. Fór þetta allt í einhverjar fjárfestingar einhvers staðar í útlöndum, fjárfestingar sem nú eru lítils virði? Og nú þarf íslenska ríkið (þ.e. Íslendingar) að borga hollenskum almenningi tapið. Annars eru Hollendingar bara rólegir yfir þessu og ég verð ekki var við neitt eins og virðist hafa átt sér stað í Bretlandi.

Tónleikar með Emiliönu Torrini

2008-10-12T23:55:00.002+02:00

Við Ásgeir vorum áðan á tónleikum með Emiliönu Torrini sem hún hélt í aflagðri kirkju nálægt miðbænum. Ásgeir var búinn að kaupa miða á tónleikana og ég mátti ekkert vita fyrr en við vorum komnir á staðinn. Tónleikarnir voru auðvitað mjög skemmtilegir og Emilíana á sér marga aðdáendur greinilega. Enginn aðsúgur var gerður að okkur Íslendingum þrátt fyrir Icesave-vandamálið og íslensku fjármálakreppuna sem hefur verið á allra vörum hér undanfarið. Hollendingar virðast frekar rólegir yfir þessu öllu þó að fólki með Icesave-reikninga hafi brugðið.
Mér líkar vel á nýja spítalanum í Alkmaar, hann minnir óneytanlega á LSH, er svipaður að stærð (aðeins minni) og stemmningin í meinafræðinni góð.
Þetta blogg átti að vera lengra en klukkan er orðin allt of margt. Kveðja, Pétur.

Mastersverkefni lokið

2008-10-01T20:37:00.006+02:00

Þá er mastersverkefninu loks lokið. Ég var á Íslandi frá miðvikudegi til þriðjudags og varði verkefnið á mánudaginn var. Fyrirlesturinn gekk mjög vel. Meginhluti tímans á Íslandi fór í að gera fyrirlesturinn, nokkrar æfingar og ítarlegar yfirferðir með leiðbeinendunum og öðrum sérfræðingum er koma að rannsókninni. Ég er þeim þakklátur fyrir að hafa sett tíma sinn í þetta, fyrirlesturinn varð margfalt betri fyrir vikið.
Auðvitað var margt á síðustu stundu eins og oft vill verða. Ég var seinn að koma mér niður á Læknagarð til að halda fyrirlesturinn og þá mundi ég eftir því að Sigurdís hafði ráðlagt mér að lesa nú til öryggis ritgerðina fyrir fyrirlesturinn því að prófararnir gætu spurt úr hinu og þessu í inngangnum. Ég ákvað því að kíkja á örskotsstundu á tvær blaðsíður sem mér fannst helst þörf á að rifja upp, sit í bílnum á planinu fyrir utan Læknagarð og þá var bíl lagt við hliðina á mér. Þar var gestur kominn á fyrirlesturinn og sér mig, örfáum mínútum fyrir klukkan fjögur, að lesa eigin skrif úti í bíl! Þegar ég kom inn sagði Jón Gunnlaugur, leiðbeinandi: "Gott að þú ert kominn." Kynningin var skondin að því leyti að ég var kynntur sem Bjarni eftir að ég hafði áður verið kynntur sem Pétur rétt áður.
Í Íslandsheimsókninni náði ég ekki að gera ýmislegt sem til hafði staðið. Ég hafði ætlað að djamma pínulítið en var of þreyttur til þess, ég ætlaði í sund en náði því ekki, ég ætlaði í partí á laugardagskvöldið en komst ekki. Ég náði samt að gera heilmikið og er ánægður með að hafa leyst fyrirlesturinn vel af hendi.

Smá ráð til þeirra sem nota flugfélar: Ekki koma 8 mínútum fyrir brottfarartíma út að hliðinu (ég fékk áminningu). Gulli segir að maður verði að vera kominn hálftíma fyrir flug út að hliði, annars megi skilja mann eftir eða láta "standby" farþega fá sætið.

Fyrsti dagurinn í Alkmaar var í dag. Tók lestina út eftir og lenti í smá ævintýri á leiðinni. Flestar lestarstöðvar eru frekar illa merktar í Hollandi og ef maður missir af hinu eina skilti á lestarpallinum er ekki alltaf gott að vita hvar maður er. Ég sat í aftasta vagni lestarinnar, vagninum sem fer til Alkmaar og lestin staðnæmdist á lestarpalli sem ég hélt allt í einu að væri kannski í Alkmaar. Spyr gamla konu: "Is dit Alkmaar?" og hún sagði já. Þá stekk ég út og dyrnar lokast strax á eftir mér. Auðvitað kom í ljós að þetta var 2 stöðvum á undan Alkmaar og horfði ég illilega á konuna gegnum gluggan þegar lestin fór framhjá. Hún hefur sennilega haldið að ég væri að spyrja hvort þetta væri vagninn til Alkmaar. Tók svo næstu lest 10 mínútum seinna og var ekki seinn þar sem ég hafði lagt snemma af stað. Keypti á lestarstöðinni í Alkmaar keypti ég regnhlíf á 4.5 evrur af því að það var farið að rigna. Ég var ekki búinn að nota regnhlífina í mínútu (ég er ekki að ýkja) þegar hún gjörsamlega rústaðist í veðrinu. Fyrst blés undir hana þannig að hún flettist í öfuga átt, við það brotnuðu litlu vírarnir meira og minna og síðan liðaðist prikið af hlífinni og ég kastaði svo draslinu í næstu ruslatunnu. Allt tók þetta ekki meira en 1-2 mínútur. Þar að auki var eiginlega hætt að rigna. Þetta var fáránlegt og fólk í kringum mig gat ekki annað en hlegið.

Allur dagurinn fór í kynningu á spítalanum í Alkmaar. Það var meðal annars stutt skyndihjálparnámskeið, leiðsögn um spítalann og margt fleira. Svo heldur kynningin áfram á morgun.

Kveðja, Pétur.

Smá blogg

2008-09-11T21:20:00.005+02:00

Við Ásgeir höfum brallað ýmislegt undanfarið. Í síðustu viku fórum við á tónleika með Madonnu á risastórum leikvangi hér í Amsturdammi. Þetta var mjög skemmtilegt, bæði mjög flott sýning og góð tónlist, þar á meðal mörg gömul lög í nýjum útgáfum.
Ásgeir er byrjaður að vinna í Arnhem, lítilli borg sunnan við Amsterdam. Þar æfir hann með dansflokki verk eftir Jens van Daele sem heitir einni höfuðsyndanna, Leti. Þetta er eins konar sería verka þar sem höfuðsyndirnar eru færðar í dans. Það verður samt ekki eintóm leti á sviðinu því að með leti er átt við ýmiss konar áhuga- og sinnuleysi. Þar sem Arnhem er í allnokkurri fjarlægð frá Amsturdammi gistir Ásgeir þar nokkrar nætur í viku. Sjálfur þarf ég að taka lest í vinnuna frá og með fyrsta október þegar ég fer að vinna í Alkmar, litlum ostabæ (sem reyndar er stærri en Reykjavík hvað varðar íbúafjölda) við sjóinn. Það er hluti af sérnáminu að vinna á minni spítala um skeið. Annars hefur eins og endranær verið nóg að gera í vinnunni. Ég hef verið í cýtólógíu síðustu þrjár vikur. Það er undirgrein meinafræðinnar. Venjulega er ég í svokallaðri líffærameinafræði (líka kallað vefjameinafræði) þar sem maður skoðar líffæri og vefi í samhengi. Í cýtólógíu (frumufræði) eru hins vegar stakar frumur skoðaðar. Oftast er um að ræða svokölluð leghálsstrok þar sem skimað er fyrir leghálskrabbameini og forstigsbreytingum þess með smásjárskoðun. Þá sér maður stakar frumur sem hefur verið klesst á smásjárgler. Síðan er reyndar margt annað skoðað ef ástæða er til, t.d. frumur í heila- og mænuvökva, fleiðruvökva, þvagi og svo fínnálarsýni úr ýmsum líffærum. Það vill svo til að meinafræðingar ná í sum þessara sýna þannig að ég farinn að hitta sjúklinga aftur og sting þá til að ná í sýni. Ég hef séð nokkur áhugaverð sýni, m.a. lymphoplasmocytosis í mænuvökva annars vegar vegna MS og hins vegar vegna Borreliosis, adenoid cystic carcinoma í munnvatnskirtli og smáfrumukrabbamein í fleiðruvökva. Flest sýnin eru reyndar heldur daufleg - alls kyns lausar frumur sem enga sögu hafa að segja. Til hliðar við cýtólógíuna er ég á eins konar húðrotasjón þessa dagana og sé því mikið af alls kyns húðkvillum. Hef séð ýmsar æðabólgur, húðbólgur og margt fleira.
Nú líður að því að ég komi til Íslands út af mastersverkefninu. Verð á Fróni síðustu vikuna nú í september og er því þessa dagana einnig að undirbúa það allt saman.
Þessa dagana eru margar fréttir af verkfalli ljósmæðra sem munu hafa dregist aftur úr almennri launaþróun miðað við menntun og annað. Ég skil ekki af hverju það þarf 6 ára nám til að verða ljósmóðir - 4 ár í hjúkrun og svo tveggja ára ljósmóðurfræði. Þetta virðist óþarflega langt nám í heildina fyrir afmarkað starf og mætti e.t.v. stytta í 4 ár, hafa ljósmóðurfræði sem sérstaka línu í hjúkrunarfræði. Í fréttum voru laun ljósmóður eftir samfellt 6 ára nám borin saman við laun hjúkrunarfræðings eftir 4 ára nám og 2 ára vinnu. Þar munaði ekki miklu, 10-20 krónum á mánuði. Mér finnst þetta í fyrsta lagi lítill munur og í öðru lagi er ég ekki viss um að einhver nýútskrifaður úr námi eigi endilega að hafa sambærileg eða hærri laun en einhver með 2 ára starfsreynslu. Menn þurfa að gera það upp við sig hvort ljósmóðurstarf eigi að vera hærra launað en starf hjúkrunarfræðings. Ef svo er gæti það stutt lengra nám og hærri laun. Sé svo ekki er ástæða til að stytta námið.
Kveðja, Pétur.

Góðir dagar

2008-09-04T17:36:00.003+02:00

Það er sko góð ástæða fyrir því að við höfum ekki bloggað að undanförnu. Við höfum einfaldlega haft annað og betra að gera, sem ég mun nú deila með ykkur hér.

Á föstudaginn síðasta komu þau Bjarki bróðir og Helga mágkona í heimsókn. Það má með sanni segja að þau hafi komið með góða veðrið með sér (þó ekki frá Íslandi) því það hafa ekki sést eins góðir dagar allan ágústmánuð. Sólin byrjaði að skína rétt áður en þau lentu á föstudeginum og hélst fram á mánudagskvöld. Það var gaman að sýna þeim borgina. Við gengum út um allt og vorum fljótlega búin að afgreiða öll fyrirhuguð fata- og gjafakaup. Við Pétur erum orðnir nokkuð sjóaðir í leiðsögumannahlutverkinu og það eru nokkrir staðir sem okkur finnst gaman að sýna gestum okkar: Blómamarkaðurinn við Singel, brýrnar við Amstelána, leðurblökubrúin rétt hjá húsinu okkar, Albert Cuyp markaðurinn, rauða hverfið, skakki barinn frá 17.öld, kastalinn á Nieuwmarkt, kínahverfið og svo auðvitað fínu síkin Heren-, Kaizer- og Prinsengracht.
Þrátt fyrir þó nokkra göngu náðum við sko heldur betur að slappa af. Við nutum þess líka að borða góðan mat, bæði hér heima og á fínum sushistað í kínahverfinu. Ég reyndi að sannfæra alla viðstadda um að prófa marglyttu sushi en það lét enginn til leiðast.
Á sunnudeginum fórum við til Haarlem. Haarlem er aðeins 15 mínútur frá Amsterdam með lestinni. Þetta er mjög rólegur bær sem stendur við bakka árinnar Spaarne og hefur þar staðið síðan á 10.öld. Það var mikil traffík á ánni og allir sem vettlingi, báti eða snekkju gátu valdið sigldu um í veðurblíðunni. Við fylgdumst með af árbakkanum en skoðuðum einnig endurbyggða myllu, kirkjur og torg. Á röltinu álpuðumst við óvart inn í rauða hverfi Haarlem. Það samanstendur af tveimur götum, og býður upp á klámbíó, hjálpatækjabúð og einn glugga með rauðu ljósi. Það virtist sem það hefði ekki verið mikið að gera hjá konunni í glugganum þennan sunnudagseftirmiðdag. Hún reyndi mikið að blikka Bjarka bróður þegar við gengum þarna framhjá. Þegar heim var komið elduðum við krækling með brauði og salati og var þetta í fyrsta skipti sem Helga borðaði ferskan krækling. Mér finnst skipta miklu máli hvernig kræklingur er eldaður. Við vorum sammála um að vel hefði tekist til.

Það var mjög gaman að fá Bjarka og Helgu í heimsókn. Ágústmánuður hefur tvímælalaust verið fjölskyldumánuður því Elín og Mamma komu fyrir 3 vikum.

Ásgeir

Kominn heim frá Berlín

2008-08-24T22:42:00.002+02:00

Skrapp til Berlínar um helgina. Tími til kominn að lyfta sér upp eftir ritgerðarskilin. Þangað var Ásgeir kominn einum degi á undan mér en við vorum hjá vinkonum Ásgeirs frá Svíþjóð. Það var gaman að koma aftur til Berlínar, var þar síðast fyrir um 5 árum. Þá var uppbygging mjög áberandi en virðist mun lengra komin núna. Við skoðuðum m.a. leifar af múrnum og þar í grenndinni voru leyfar af undirstöðvum höfuðstöðva Gestapo með áhugaverðri myndasýningu. Í borg þar sem minningarnar um það sem gerðist í seinni heimstyrjöldinni eru hvarvetna er skrítið að nýnasismi skuli vera til staðar. Til dæmis sá ég mann á gangi með labradorhundinn sinn og með nasistamerki á úlpuerminni. Þá sáum við nýnasistalega gaura hrópa úr bíl á Tyrkina sem voru margir í hverfinu þar sem við bjuggum. Annars er Berlín ódýr borg. Eftir því sem við fréttum er húsaleiga lægri en t.d. í Amsterdam og matur var greinilega ódýr, sérstaklega alls konar skyndibitastaðir sem voru út um allt. Fékk mér t.d. góðan kebab á 2,8 evrur.
Vinnan hefur gengið sinn vanagang. Síðasta vika var fremur róleg. Hef verið með nokkur áhugaverð sýni, t.d. smáfrumukrabbamein í þvagblöðru, amelanotic large and spindle cell melanoma, ristilkrabbamein með tap á MSI-6 (sem þýðir að viðkomandi er sennilegast með HNPCC), nasopharyngeal carcinoma og síðan enn eitt sýnið sem samanstóð af tungu, barka og hálseitlum.
Kv. Pétur.

Senda

2008-08-20T07:44:00.003+02:00

Það var einstaklega góð tilfinning að ýta á takkann "send" í gærkvöldi þegar ritgerðin var loks tilbúin og ég sendi hana gegnum alnetið til Íslands.
Kveðja, Pétur.

Enn ein helgin í verkefninu

2008-08-10T22:42:00.002+02:00

Á maður að blogga í tilbreytingarleysinu? Ég þarf að klára mastersverkefnið í vikunni og hef því setið hér alla helgina. Hef ekkert farið út frá því að ég kom heim á föstudag. Gleymdi að fara með hjólið í viðgerð. Hef auðvitað afkastað miklu og loks er komin sæmileg mynd á þetta allt saman. Kveðja, Pétur.

Gay pride í Amsterdam

2008-08-03T03:51:00.002+02:00

Hér var gay pride í dag. Það er samt ekki hægt að kalla þetta gleðigöngu því að ekki er gengið heldur siglt eftir löngu sýki í borginni. Þetta voru um 80 bátar, oftast með tónlist og dansi. Borgarstjórinn fór fyrir stafni á fremsta bátnum. Bæði var um að ræða alls kyns samtök og félög, einkaframtak, skemmtistaði og stórfyrirtæki, s.s. banka. Hvorki var boðið upp á Íslendingabát né meinafræðibát þannig að ég horfði bara á. Annars hef ég setið og unnið í ritgerðinni. Þetta þokast allt í rétta átt. Kveðja, Pétur.

Hitabylgja

2008-07-31T20:37:00.003+02:00

Mér skilst að það sé hitabylgja á Íslandi. Hvað þá hér í Amsterdam. Hér er heitt allan daginn og allt of heitt í vinnunni, viftan er stanslaust í gangi. Þaðan er það að frétta að ég fékk allt í einu þau skilaboð að ég ætti að fara á spítalann í Alkmar (lítill bær úti við sjó) eftir tvo mánuði til vera þar í ár. Það er svo í öllu/flestu? sérnámi hér í Hollandi að hluti fer fram á minni spítulum, þ.e.a.s. ekki eingöngu á sérhæfðu háskólasjúkrahúsunum. Samkvæmt skema átti þetta að vera frá og með september 2009 en hefur nú verið ýtt fram um ár vegna einhverra tilfærslna. Mér gremst þessar hrókeringar, aðallega stuttur fyrirvari, þó að mér sé í sjálfu sér ekki illa við að fara á þennan perifera spítala. Það þýðir lest 1 klst. hvora leið daglega. Var svo að basla við ansi svakalegt sýni af skurðstofunni; það samanstóð af öllum neðri kjálka með tungu og áfastur var smá hluti af koki, allur barki með skjaldkirtli, hálseitlar og aðeins af hálsvöðvum. Mæli ekki með reykingum og munntóbaki. Kv., Pétur

Rífandi gangur í ristilverkefninu

2008-07-22T21:15:00.002+02:00

Ristilverkefnið gengur loksins ágætlega. Tími til kominn. Þrátt fyrir tölvuvesen og tölfræðileg vandamál er þetta á réttri leið. Sótti makkann úr viðgerð í dag. Það var búið að setja inn nýja makkastýrikerfið Leopard, sem ég var býsna ánægður með.

Var að enda við að elda og borða spaghetti carbonara. Ég mæli ekki með því að hollenski osturinn Old Amsterdam sé notaður í staðinn fyrir parmesanost. Þetta bara passar ekki saman.

Síðastliðna viku og þessa viku er krufningatörn hjá mér. Þetta hafa verið hálfgerð réttarlæknisfræðileg tilfelli. Þrisvar sinnum var um að ræða alkóhólista sem höfðu fundist meðvitundarlausir, þar af tveir sem höfðu dottið á höfuðið og hlotið mikinn heilaskaða. Loks var maður sem hafði keyrt á mótorhjóli á tré og hlotið alls kyns háorkuskaða. Eitt sjaldgæft tilfelli rak einnig á fjörur mínar, neurocoeliac disease ("glútenóþol" í heila), eða raunar er það spurningin sem svara þarf með krufningunni.

Framundan er heimsókn til Ásgeirs, til Vínar nánar tiltekið, þar sem hann er á danshátðinni Impulstanz. Þetta er stíf dagskrá með dansnámskeiðum og óteljandi danssýningum. Ég ætla reyndar ekki að fara á dansnámskeið á meðan heimsókninni stendur - var þó tímabundið að íhuga að skrá mig í eitthvað rosalega framúrstefnulegt. Sjáum hvað setur.

Kveðja, Pétur.

Harði diskurinn ónýtur

2008-07-17T17:49:00.002+02:00

Þá er það komið á hreint. Harði diskurinn er ónýtur og nýr verður settur í tölvuna, móðurborðið er í lagi. Tölvugaurinn hafði ekki séð svona tilfelli áður. Ég útskýrði fyrir honum hvað hefði gerst og hann taldi líklegast að sökudólgurinn væri forritið Paralell desktop, forrit sem keyrir Windows á Makka - slegið hefði í brýnu milli þessara tveggja tölvuheima. Sem betur fer vorum við Ásgeir með nýleg afrit af öllum ljósmyndum og allri tónlist auk þess sem ég hafði kvöldið áður tekið afrit af öllum ristilgögnum. Það sem tapast eru hlutir sem ágætt var að vera með, t.d. Microsoft-pakkinn (þurfum að redda honum upp á nýtt) og hin og þessi skjöl og gögn, t.d. heimilisbókhaldið. Mér var sagt að það myndi kosta stórfé að fá einhvern til að bjarga gögnum af harða disknum.
Mig langar til að ráðleggja öllum að taka reglulega afrit af tölvugögnum.

Tölvan ónýt?

2008-07-16T18:14:00.004+02:00

Makkinn neitar að fara í gang eftir að hafa frosið í gærkvöldi. Þetta var óneitanlega svolítið áfall. Það eina sem gaurinn í tölvubúðinni sagði var að ástandið væri slæmt en vissi lítið um málið og benti mér á að fara með tölvuna á verkstæðið á morgun. Það er dæmigert að þetta árans tölvudrasl virki ekki þegar maður þarf mest á því að halda - aðeins mánuður í skiladag mastersritgerðarinnar. Sem betur fer tapaðist engin vinna þar sem ég hafði afritað allt ristildótið daginn áður og sem betur fer var Ásgeir nýlega búinn að taka afrit af öllum myndum. Eftir situr spurningin um hitt og þetta sem var í tölvunni og væri leiðinlegt að missa. Móðurborðið er víst ónýtt en vonandi hafa gögnin í tölvunni haldist heil. Þetta setur smá strik í reikninginn varðandi vinnuhraða á komandi dögum. Ég hef sem betur fer gamla PC-fartölvu sem ég get notað.

Kveðja, Pétur.

Á kafi í rannsóknarverkefni

2008-07-13T14:45:00.003+02:00

Hef setið hér við tölvuna alla helgina og velt fyrir mér tölfræði, faraldsfræði og framsetningu gagna. Verkefnið silast áfram, gengur ágætlega. Gott kaffi ásamt góðri tónlist og fallegu útsýni út um gluggann gerir þetta sæmilega notalegt. Borðstofuborðið er orðið að tölvuveri; hér eru tvær tölvur á borðinu, ein fyrir tölfræðiforritið og hin fyrir ritvinnslu og síðan er pappír í kring í bunkum. Skilafresturinn er um miðjan ágúst. Á þeim tíma verð ég í fullri vinnu þannig að ég verð að nýta helgar og kvöld vel. Jæja, best að fara aftur í verkefnið.
Kveðja, Pétur.

Villtist á leiðinni heim

2008-07-10T21:01:00.003+02:00

Hélt fyrirlestur í vikunni í vinnunni um eitla í ristilkrabbameini. Til að spara mér tíma ákvað ég að hafa fyrirlesturinn á ensku. Fyrirlesturinn gekk ágætlega. Einum sérfræðingnum þótti reyndar frekar slappt að ég skyldi tala á ensku og sagði að næst yrði fyrirlesturinn á hollensku. Stundum er ég svolítið þreyttur á þessu svo sem ágæta tungumáli - ekki síst undanfarið þar sem ég finn að mig vantar mikið af almennum orðaforða. Ég get talað tungumál vinnunnar en segi frekar oft ha - og ég er búinn að vera hér í 10 mánuði. ... Þetta kemur allt, samt þreytandi að bíða eftir því. Það er ergilegt að missa oft þráðinn þegar ég hlusta á umræður. Ég þyrfti eiginlega að fara að lesa eitthvað á hollensku eða horfa meira á sjónvarp - ég bara nenni því ekki.

Hef verið með ýmis áhugaverð sýni. Fékk eitt sjaldgæft í gær, æxlisvöxt í eyrnagöngunum. Verð væntanlega að baksa með þetta sýni næstu vikurnar á meðan beinið verður í afkölkun og annarri vinnslu fyrir smásjárskoðun.

Hef hjólað ýmsar nýjar leiðir í vinnuna og heim undanfarið. Villtist allsvakalega í gær, vissi ekki hvar ég var og þegar ég spurði til vegar var ég í hinum bæjarendanum og stefndi í öfuga átt.

Kveðja, Pétur.

Viðrar vel

2008-07-06T11:39:00.003+02:00

Hér í Amsturdammi er heitt alla daga og hálfgerðar hitaskúrir suma eftirmiðdagana. Það er oft allt of heitt í vinnunni og viftan höfð í gangi. Ásgeir hefur verið hér í Amsterdam í rúma 10 daga en heldur á morgun til Vínar á Impulstanz danshátíðina í Vín sem stendur í 4-5 vikur. Af 1100 umsækjendum var hann einn af 60 manns sem hlutu styrk til að fara á hátíðina sem samanstendur af námskeiðum, danssýningum, vinnubúðum og fyrirlestrum. Svo fer ég í helgarferð til Vínar að hitta Ásgeir eftir nokkrar vikur. Við Ásgeir höfum nú síðustu daga haft gesti; Gulli kom óvænt og var hjá okkur í tvær nætur og Hjörtur kom frá Delft þar sem hann hafði verið á ráðstefnu. Svo héldum við upp á 26 ára afmæli Ásgeirs síðastliðna helgi, hér var partí og m.a. boðið upp á áfenga hlaupköku. Restin af henni var ekki sérlega lystug daginn eftir.
Það hefur eins og endranær verið nóg að gera í vinnunni og ég hef fengið ýmislegt áhugavert að fást við (t.d. ovarian teratoma with malignant transformation, mixed germ cell tumor í eista, flöguþekjukrabbamein í augnslímu, glomus tumor, 11 kg ovarial mucinous cystadenoma). Ristilverkefnið er komið á fullt skrið og ég vinn í því flestum lausum stundum enda tíminn orðinn knappur til að klára haustútskrift (Óskar, þú getur enn orðið til að útskrifast með MS á undan mér!).

Kveðja, Pétur.

Óvænt afmælisgjöf

2008-06-26T18:31:00.004+02:00

Ég á afmæli í dag. Til hamingju ég!

Fyrir 26 árum síðan fæddist í þennan heim yndislegi, litli, ljóshærði ég.

Í dag er ég ekki bara afmælisbarn heldur líka atvinnulaus. Ég kláraði nefnilega samninginn minn í Newcastle í gær og flaug heim í dag. Nú á ég 10 daga frí hérna í Amsturdammi áður en ég held til Vínar á stærstu danshátíð Evrópu, ImpulsTanz. Þar ætla ég að dansa, horfa á dans, hugsa um dans, tala, skrifa og dreyma dans í fimm vikur.

Í dag fékk ég líka óvænta afmælisgjöf. Óvænt er ekki alltaf gott. Þegar til Hollands var komið uppgötvaðist að farangurinn minn hafði týnst. Ekki gaman... púúúú á KLM og flugvallarstarfsmenn í Newcastle.

Kv. Ásgeir

Toscana

2008-06-14T22:51:00.003+02:00

Þá er ég nýkominn úr frábærri ferð til Toscana þar sem ég var í góðum félagsskap með Þorgeiri og Helgu (ásamt Eyjólfi og Gesti), Árna og Steinunni (ásamt Nínu), Óskari og Önnu (ásamt Atla), Sjonna og Tuma. Við leigðum stóra villu til tveggja vikna. Villan var staðsett miðja vegu milli Písa og Flórens. Þetta var stórt og frekar gamalt hús á tveimur hæðum með mjög fallegt útsýni yfir sveitina, sundlaug, stórt eldhús, sex stór svefnhergbergi á efri hæð og stóra stofu með arni. Þetta er fyrsta sinn sem ég kem til Toscana og er ég heillaður af þessu svæði eftir ferðina. Maturinn var frábær og hvar sem við komum var ótrúlegur menningararfur. Milli þess sem við fórum út að borða á ekta ítölskum veitingastöðum gerðum við okkar eigin ítalskan mat í villunni. Við grilluðum kálfakjöt, við bökuðum pítsur í útiofni og gerðum líka góðan mat í eldhúsinu. Það var eins gott að Helga er áhugasöm um ítalska matargerð enda nutum við góðs af því. Milli þess sem við slökuðum á í villunni fórum við í ferðir um Toscana til að skoða enda margt að sjá. Við fórum m.a. til Flórens, Písa, Lucca, Volterra, San Gimignano og Colle di Val d´Elsa. Ég hafði ekki áður gert mér fyllilega grein fyrir því hversu mikilvægt þetta svæði hefur verið í menningarsögunni, sérstaklega hvað varðar endurreisnina. Það var oft eins og maður væri kominn aftur í miðaldir eða á endurreisnartímann. Ég mæli eindregið með ferð til Toscana.
Kveðja, Pétur.

Newcastle

2008-05-27T23:31:00.002+02:00

Ég var í Newcastle síðastliðna helgi. Ásgeir er þar tímabundið við vinnu. Hann leigir herbergi hjá fyrrverandi flamengodansara, Spánverjanum Raúl. Ég kom seint á föstudagskvöldið og var sóttur á flugvöllinn en Ásgeir býr í bæ við hliðina á Newcastle sem heitir Wallsend, samanber að þar endaði rómverskur múr sem markaði norðurenda Rómverska heimsveldisins. Enn í dag er hægt að sjá hluta veggjarins. Á laugardeginum skoðuðum við Newcastle, gengum um götur borgarinnar. Newcastle var verkamannaborg sem byggðist upp kringum kolavinnslu og skipasmíði. Nú til dags stundar varla nokkur þessar atvinnugreinar og flestir vinna við alls konar skrifstofustörf. Hollendingar hafa sérkennandi útlit og það er engin spurning að fólk í Newcastle hefur líka ákveðið yfirbragð; algengt var að sjá fremur kringluleit andlit, roða í kinnum, svolítið spik og karlarnir voru oft með lítið hár á höfði. Á laugardeginum var mikið af eirðarlausum unglingahópum í miðbænum og Goth-stíllinn var í tísku en Gilsinegger-útlitið var hvergi að sjá.
Við horfðum á Eurovision á laugardagskvöldið. Við bjuggumst eiginlega við að Ísland fengi fleiri stig. Verst var að sjá slepjulegt atriði frá Rússlandi hljóta flest stig. Skautarinn var einstaklega hallærislegur. Eftir Eurovision skoðuðum við aðeins næturlífið í Newcastle. Það var frekar dýrt og ekki að öllu leyti samkvæmt nýjustu tísku en skemmtilegt að sjá. Eftir frábæra helgi hjá Ásgeiri, þar sem raunar var einnig haldið upp á afmælið mitt, hélt ég heim á sunnudeginum.
Vinnan gengur sinn vanagang. Flest sýni sem ég hef fengið hafa verið býsna venjuleg. Það er merkilegt hvað það er mikið af sortuæxlum enda hefur þeim æxlum farið mikið fjölgandi. Það er gaman að einn meinafræðingurinn er mikill sérfræðingur í sortuæxlum og erfið tilfelli eru send frá öllu Hollandi og víðar til hans til mats. Það vill nefnilega svo til að oft er erfitt að greina þessi æxli og aðrar skyldar breytingar.
Kveðja, Pétur.

Júró og fleira

2008-05-22T23:52:00.003+02:00

Ísland komst áfram og Júróbandið stóð sig mjög vel. Ég hef ámálgað söngvakeppnina við fólk í vinnunni og ýmist virðist fólk ekki vita að keppnin sé í gangi eða segist ekki hafa áhuga - fyrir utan Alexi, deildarlækninn frá Georgíu, sem vildi að ég kysi Georgíu í kvöld. Hollenski þulurinn gerir mikið í því að segja eitthvað neikvætt um keppendur, talaði t.d. um botox-popp frá Svíþjóð og að söngkonan frá Póllandi hefði verið með tennurnar í bleikingu í þrjá mánuði fyrir keppnina. Hann talaði reyndar jákvætt um íslenska lagið og taldi að það kæmist áfram. Þeir Hollendingar sem hafa skoðun á keppninni tala um ofríki austur-evrópskrar blokkar, landa sem áður voru eitt en eru nú aðskilin og kjósa hvert annað. Ég held að þetta skýrist nú líka af metnaðarleysi í Vestur-Evrópu.

Hagsmunaöflum og sumum stjórnmálamönnum ætlar að takast að hafa áhrif á þróun Vatnsmýrarinnar og flugvallar í Reykjavík. Núverandi borgarstjóri, sem virðist ekki fulltrúi eins eða neins í Reykjavík, er alfarið á móti því að flugvöllurinn fari og ætlar að nota stuttan valdatíma til að bolta flugvöllin niður til eilífðarnóns. Í dag voru birtar myndir af fyrirhugaðri samgöngumiðstöð. Flugvöllurinn verður alveg við hliðina á hinum lágreista og víðfeðma framtíðarlandspítala. Var hugmyndin um þéttingu byggðar og tækifæri í Vatnsmýrinni draumur í dós?

Söngvakeppni evrópskra sjónvarpsstöðva

2008-05-19T22:56:00.003+02:00

Í dag spurði ég einn meinatækninn hvort til stæði að fylgjast með Eurovision. Hún er um það bil 25 ára. Það kom mér á óvart að hún vissi ekki hvað Eurovision var og þegar ég sagði henni að það væri söngvakeppni milli Evrópulanda sagðist hún ekki hafa fylgst með þessu. Þetta var mjög skrýtið. Ég ætla að gera frekari stikkprufur í vinnunni á næstu dögum hvað varðar Eurovisionáhuga.
Kveðja, Pétur.

Aftur einn í kotinu

2008-05-18T13:15:00.003+02:00

Ásgeir fór tímabundið til Newcastle í morgun. Þar verður hann í nokkrar vikur í vinnu. Því er ég orðinn einn í kotinu. Ætla að vera rosalega duglegur næstu daga í ristilverkefninu. Svo skrepp ég næstu helgi til Newcastle til að heimsækja Ásgeir.

Inga Jóna kom við hjá okkur í gær og gisti eina nótt á leið til bróður síns í Groningen. Eftir kvöldmat skruppum við niður í bæ og skoðuðum næturlífið - fórum reyndar ekki í Rauða hverfið en nóg var að sjá á skemmtistöðunum kringum Leidseplein og Rembrandtplein. Á leiðinni heim duttum við inn á skondinn stað við Rembrandtplein. Þarna var mestmegnis fólk á aldrinum 20-25 ára. Um leið og við komum inn kom maður með hollenskt hár (lesist: fremur sítt hrokkið hár greitt aftur og bak við eyru) og reyndi að dáleiða Ingu Jónu með handahreyfingum. Seinna virtist sama trix virka á einhverja stelpu þarna inni en Inga Jóna lét ekki táldragast af þessu dyndilmenni. Við fengum okkur einn bjór þarna inni bara til að skoða og stemmningin var skrýtin. Það var skipt um lög á 1 mínútu fresti og það var allt frá jóðli og gömlum hollenskum lögum í bassaútsetningu yfir í nýrri tónlist af vinsældalistunum. Margir virtust kunna textana við lögin. Reglulega var stórum bjöllum yfir barnum hringt svakalega en án augljóss tilgangs. Einn bjór þarna dugði alveg og þetta var síðasti staðurinn á bæjarröltinu.

Fyrir liggur Söngakeppni evrópskra sjónvarpsstöðva þessa vikuna. Ég hef aðeins fylgst með þessu og hlakka til að sjá hvernig íslenska hópnum gengur. Hollenska lagið er ekkert spes, mæli með því að haldið sé fyrir eyrun.

Annars er merkilegt að fylgjast með þróun fjármála á Íslandi. Til marks um verðbólguna og hækkun vöruverðs frétti ég af eins og hálfs árs gömlum bíl sem seldist nú á lítið eitt hærra verði en hann var keyptur á.

Kveðja, Pétur.

Veggjakrot

2008-05-16T18:22:00.004+02:00

Eins og margir vita fylgdist ég grannt með þróun veggjakrots og umræðu þar að lútandi þegar við Ásgeir bjuggum í miðbænum. Var mér orðið nóg boðið strax fyrir mörgum árum en það er eins og ekki hafi soðið upp úr hjá almennum borgurum fyrr en á síðastliðnu 1-2 árum - enda ekki skrýtið þar sem bæði var um að ræða uppsafnað krot, aukið krot og óforskammaðra. Í umræðunni um veggjakrot, orsakir og lausnir, kom alltaf upp það viðhorf að borgin kæmi ekki til móts við krotara, hefði fækkað leyfilegum krotveggjum og með því að taka upp leyfileg og afmörkuð krotsvæði mætti að einhverju marki leysa vandann. Þessi rök fóru alltaf í taugarnar á mér því að reynslan sýnir að þetta hefur ekkert að segja og er meira að segja líklegt til að auka krot alls staðar í kringum leyfilegu krotsvæðin (Austurbæjarskóli er gott dæmi um þetta). Krotarar nota það sem afsökun og réttlætingu að einhverjir leyfilegir krotveggir hafi verið teknir af þeim og hér sé því um mótsvar að ræða og mótmæli. Þessi rök eru mikil einföldun því að það að stunda veggjakrot er eins konar lífsstíll og í leiðinni árátta sem felst í því að gera eitthvað sem vekur spennu, keppast við að krota sem víðast, samkeppni við aðra krotara og öðlast orðstír í krotheimum. Hvað varðar spennufíknina og samkeppnina er óhjákvæmilegt að gengið sé æ lengra í krotinu og meðal annars þess vegna hefur vandamálið vaxið. Af hverju einhverjir leiðast út í krot er sjálfsagt margþætt en snýst að einhverju leyti um lífsstíl aldurshópsins 11-18 ára og það sem er í tísku.
Til þess að minnka vandamálið þarf væntanlega að beita svipuðum aðferðum og varðandi reykingar, áfengi og fíkniefni - þ.e. að fá fram viðhorfsbreytingu innan hópsins. Áhrif foreldra skipta líka gríðarlegu máli.
Annar partur af núverandi vandamáli er að þeir sem fyrir krotinu verða gera lítið í því, leggja hvorki fram kæru né mála yfir krotið. Það hefur sýnt sig að ein besta forvörnin gegn kroti er að hafa ekkert krot á sínum vegg. Alls staðar þar sem krot er til staðar kemur meira krot í veldisvexti. Hvað varðar kærur tók lögreglan þessum málaflokki áður vettlingatökum og gáfust sumir því upp en það virðist breytt í seinni tíð. Þó er enn vandamál að mörg svæði og margir veggir, sérstaklega í fjölbýlum og verslunarhúsum, eru munaðarlaus, þ.e. enginn hirðir um það eða axlar ábyrgð. Þetta vill líka vera vandamál þegar eigendur og umsjónarmenn húsnæðis skoða aldrei eignir sínar og hirða bara gróðann af leigufé. Þannig virðist veggjakrotsvandinn einnig sumpart skýrast af viðbrögðunum. Ég man t.d. eftir því að þau þrjú ár sem við bjuggum á Laugaveginum var sama krot á framhlið verslunarhússins hinum megin götunnar.
Það verður fróðlegt að koma næst heim til Íslands og sjá stöðuna á veggjakrotsmálum. Hér í Amsterdam er veggjakrot víða en ég tek minna eftir því en í Reykjavík.
Kv. Pétur.

Áfram heitt

2008-05-13T23:10:00.004+02:00

Það er áfram heitt í veðri. Þó birtust nokkur ský á himni í dag. Í vetur var oft kalt í íbúðinni okkar en nú er eiginlega of heitt. Ég er kominn í nokkurra daga vinnufrí til að komast í ristilverkefnið. Undanfarið hef ég séð nokkur áhugaverð tilfelli í vinnunni, m.a. Wilms tumor, malignant solitary fibrous tumor, serous cystadenoma í brisi og salpingitis isthmica nodosa.
Ásgeir hefur sótt danstíma á morgnana undanfarið og sinnt þar fyrir utan ýmiss konar skriffinsku og umsóknum. Hann fer næstu helgi til Newcastle til að vinna þar næstu vikurnar. Þess má einnig geta að við Ásgeir erum farnir að klippa hvor annan. Ásgeir klippti mig nýlega og ég síðan hann í gær.

Kveðja, Pétur.

Siglt um síkin

2008-05-11T10:18:00.002+02:00

Í gær var níundi góðviðrisdagurinn í röð. 27 stiga hiti og ekki ský á himni. Okkur er sagt að þetta sé óvenjulega gott veður hér.

Í gær fórum við í almenningsgarð með Báru vinkonu okkar. Borðuðum ís, vínber og melónu og lágum í sólbaði. Um eftirmiðdaginn fórum við síðan í bátsferð með hollenskum vinum okkar. Þeir sóttu okkur á bátnum og við sigldum um síkin í Amsterdam frá fimm til hálf ellefu. Báðir fengum við að prófa að stýra bátnum. Við borðuðum um borð í bátnum. Í forrétt fengum við ostrur og svo melónur og hráskinku. Í aðalrétt var pastaréttur og í eftirrétt var ljúffeng súkkulaðikaka sem Ásgeir hafði bakað. Við sigldum um alls kyns síki og líka á ánni Amstel sem rennur gegnum borgina. Borgin er öðruvísi á að líta séð frá síkjunum og margt nýtt að sjá. Bátaeign hér er fremur almenn og ekki aðeins á færi hinna ríkustu. Því má sjá í góða veðrinu opna báta af ýmsum stærðum sigla um síkin. Ekki er óalgengt að hálfgerð partí séu haldin í sumum bátanna. Amsturdammur er fallegur á sumrin og hefur aðra ásýnd en á veturna.

Síðastliðna helgi var mannmargt hér á bæ því að hér gistu fjórir gestir. Það vill svo til að við erum óvanalega vel búnir dýnum og sængum. Þetta voru Jakob og vinir hans frá Barcelona sem komu í helgarferð til Amsturdamms. Þeir nutu auðvitað góða veðursins, skoðuðu næturlífið og fóru í stórt partí sem haldið var í gamalli aflagðri kirkju.

Framundan eru vonandi sem flestir sólardagar. Kveðja frá Amsturdammi, Pétur og Ásgeir.

Ný blóm

2008-05-03T16:44:00.003+02:00

Á frönsku svölunum okkar hanga blómapottar. Í byrjun árs tók ég mig til og plantaði túlípanalaukum í íslensku fánalitunum. Bláir túlípanar yst, þá hvítir og svo rauðir í miðjunni. Við biðum spenntir eftir því að þeir blómstruðu en þegar loks kom að því þá blómstruðu þeir í vitlausum litum, hver á sínum tímanaum eða bara ekki neitt. Blái liturinn, fjallabláminn varð fjólublár. Hvíti liturinn, ísinn varð pissugulur og rauði, eldurinn í iðrum jarðar hélt sig neðanjarðar.

Núna hef ég ákveðið að gera aðra tilraun. Ég fór í hollenska Blómaval (Intratuin) og keypti fimm gasaníur (held ég að þær heiti), þrjár gular og þrjár rauðar. Ég sá reyndar nokkur önnur skemmtileg blóm í búðinni og er að spá í að skipta í ágúst og fá mér hengiblóm.

kv. Ásgeir

Hér fylgir mynd.

Drottningardagurinn

2008-04-30T18:40:00.003+02:00

Í dag er Drottningardagurinn í Hollandi. Ég var búinn að heyra um þennan dag fyrir löngu og var því forvitinn að sjá stemmninguna. Við Ásgeir fórum og gengum um miðbæinn í dag. Götur út um allt eru fullar af fólki. Á þessum degi er leyfilegt að setja upp sölubása hvar sem er og selja alls kyns dót. Auk þess er áfengi selt í stórum stíl. Við vöknuðum í morgun við að það var búið að búa til lítið partí hér í götunni okkar með gettóblaster og stemmningu. Fullt af fólki er í appelsínugulum fötum (appelsínugulur er litur Hollendinga) og öll torg eru stútfull af fólki. Víða eru plötusnúðar og það er rosaleg djammstemmning hérna sem teygir sig yfir stórt svæði. Sums staðar var svo þröngt að við komumst varla áfram. Um sýkin sigla stórir og litlir bátar með fullt af fólki og stóra gettóblastera með djammtónlist. Djammstemmningin byrjaði reyndar í gærkvöldi og það var greinilegt strax í gær að ferðamenn kæmu í stórum stíl til borgarinnar fyrir þessa hátíð. Bæði í gær og öll næstu kvöld fram á og fram yfir næstu helgi verða stór partí hér og þar. Gaman. Á morgun er líka frídagur. Í matvörubúðinni var búið að hreinsa áfengi úr hillunum. Í Amsterdam er Drottningardagurinn greinilega djammhátíð en þetta virðist vera meiri fjölskylduhátíð annars staðar enda fá börn að sjá í dag hér í Amsterdam, aðallega ungt fólk. Íbúar miðbæjarins fara oft til útlanda á meðan hátíðinni stendur.

Síðan við komum heim frá Madríd hefur verið gott veður, upp undir 20 stiga hiti suma daga og sól. Það er orðið sumarlegt um að litast og bjart langt fram á kvöld. Ásgeir er kominn heim og undirbýr alls kyns umsóknir og eldar góðan mat. Keyptum mintulauf á markaðnum síðustu helgi og við höfum fengið okkur Mohito. Nennum reyndar ekki að elda í kvöld og ætlum bara að fá okkur pítsu. Á morgun vinn ég í ristilverkefninu góða. Vinnan gengur vel - alltaf er frekar mikið að gera. Ég hef haft nokkur áhugaverð tilfelli, t.d. struma ovarii, Peutz-Jegher polyp, lifrarbólgu C með skorpulifur, gliosarcoma og AML.
Kveðja, Pétur.

Twinsz og Madríd

2008-04-17T20:46:00.004+02:00

Ásgeir var hér í Amsterdam síðastliðna helgi. Honum gekk stórvel í prufu fyrir dansverkefni í haust hér í Hollandi þannig að hann fékk starfið. Nú er hann staddur í Madríd til að sýna verkið Mur og ég fer þangað á morgun til að sjá danssýninguna og auðvitað hitta Ásgeir. Þetta er fyrsta skipti sem við báðir komum til Madrídar - verður mjög gaman.
Ég sit núna fyrir framan sjónvarpið. Í hollensku sjónvarpi er mikið af alls konar Idol-þáttum. Nýjasta útspilið er Idol bara fyrir eineggja tvíbura, kallast Twinsz. Hugmyndin er sú að mynda band samsett úr þremur tvíburapörum. Einhvern veginn hefur þeim tekist að hóa saman um 10 tvíburum með misjafna sönghæfileika en ágæta danshæfileika sem vilja reyna fyrir sér í skemmtanabransanum. Það er frekar skrýtið að sjá svona marga eineggja tvíbura saman á sviði. Í salnum er síðan hellingur af tvíburum sem hafa verið fengnir til að horfa á og mynda part af valkerfinu fyrir utan dómarana. Þess er vandlega gætt að tvíburarnir séu svipuðum eða eins fötum. Það verður forvitnilegt að fylgjast með þessu. Ég spái því að tvíburabandið komi til Íslands síðan í sumar og stígi á stokk.
Það hefur verið nóg að gera í vinnunni það sem af er þessa viku. Hef séð m.a. Fordyce spot, basal cell adenoma, spindle cell carcinoma, malignant epitheloid GIST og pulmonary veno-occlusive disease.
Kveðja, Pétur.

Ferðalög

2008-04-13T18:06:00.003+02:00

Ég var í Barcelona síðastliðna helgi; heimsótti þar Ásgeir og horfði á danssýninguna sem sett var á svið í stóru leikhúsi í miðbæ Girona sem er rétt hjá Barcelona. Mjög skemmtileg sýning. Ég kom reyndar einum sólarhring fyrr en til stóð og kom Ásgeiri á óvart þegar ég mætti óvænt síðla kvölds. Á laugardeginum fórum við til Montserrat sem er klaustur hátt í fjöllunum fyrir ofan Barcelona. Við fórum upp með kláfi og útsýnið var frábært í sólinni. Við hittum Xavier og Jakob sem hefur það mjög gott. Á sunnudeginum fór ég til Amsterdam en Ásgeir fór til Newcastle í prufu sem gekk vel svo að Ásgeir fékk þar vinnu í maí-júní. Þar var hann í vikunni í undirbúningsvinnu, gisti á farfuglaheimili og kynntist stéttaskiptingu Norður-Bretlands, óskiljanlegum framburði og skringilegum herbergisfélögum. Hann kom svo hingað til Amsterdam nú um helgina og fer til Barcelona í fyrramálið og þaðan til Madrídar á miðvikudag. Ég fer svo til Madrídar á föstudaginn, sé sýninguna aftur og við dveljum þar svo um helgina. Þetta verður fyrsta skipti okkar Ásgeirs í Madríd. Það er því mikið um ferðalög, ekki síst hjá Ásgeiri. Það hefur verið frábært að vera hér í Amsterdam saman um helgina. Veðrið hefur verið gott, sólskin og 4-13 stiga hiti eftir tíma dags.
Það var mikið annríki í vinnunni þessa vikuna og ég þurfti að vinna öll kvöld frameftir. Nokkur áhugaverð sýni sá ég, m.a. juvenile xanthgranuloma, pilmatricoma, molluscum contagiosum, rudimentary polydactyly, small cell þvagblöðruæxli, Warthin´s tumor, Pott´s disease, anemia perniciosa, smágirniscarcinoid og svo helling af venjulegri sýnum. Fyrir utan úrskurð sem tók til um helmings af vinnutímanum fékk ég um 70 sýni til smásjárskoðunar, sem sagt nóg að gera.

Vinnudagur.

2008-04-01T22:43:00.005+02:00

Í kvöld var enn eitt sérkvöldið. Í síðastliðinni viku var meinafræðikvöld, svokallaður svartur kassi þar sem meinfræðideildir á Amsterdamsvæðinu hittast og fara yfir erfið tilfelli sem lögð eru fyrir skarann. Þá fáum við fyrirfram kassa með um 15 tilfellum og eigum að finna út hvað er á ferðinni en sá sem sendi inn tilfellið kynnir og gefur síðan rétt svar og fræðslu í leiðinni. Frekar sniðugt. Í kvöld var svo lifrarkvöld en þau eru haldin á um 2-3 mánaða fresti þar sem farið er yfir áhugaverð lifrartilfelli af Amsterdamsvæðinu. Þau kvöld eru blanda af klíník, röntgen og meinafræði. Það er sem sagt lítið að frétta nema bara hitt og þetta í vinnunni. Fyrir áhugasama hef ég augum litið í dag MPNST, aspergilloma, fibrinopurulent pleuropericarditis, pneumonitis, cystic media necrosis og svo framvegis.

Stuðið heldur áfram í krufningasalnum. Til að geta deilt þessu með ykkur varði ég dágóðum tíma á netinu við að finna út hvað þessi lög heita sem óma um salina, hér er það sem ég fann:
http://www.youtube.com/watch?v=1XZ7gi1VRwU&feature=related
http://www.youtube.com/watch?v=IN5EkH3lATY&feature=related
http://www.youtube.com/watch?v=FS2Z_4ZfkyE
Kveðja, Pétur.

Á sunnudegi

2008-03-30T18:42:00.002+02:00

Ég er búinn að vera rosalega duglegur í dag; þreif íbúðina hátt og lágt, búinn að þvo þvott, strauja skyrtur og keypti í matinn. Ég þreif meira að segja örbylgjuofninn. Meðfram hef ég hlustað á góða tónlist og kíkt aðeins á netið. Í gær fór ég á námskeið í taugameinafræði fyrir deildarlækna í meinafræði sem haldið var í Nijmegen, borg sem er nálægt landamærum Hollands og Þýskalands. Þetta var mjög fínt námskeið sem stóð allan daginn. Það er líka gaman að hitta deildarlæknana frá hinum háskólaspítulunum og njósna um aðstæður og bera saman. Á eftir ætla ég að snæða pítsu en síðan ætla ég að vinna í ristilverkefninu.
Fylgist einhver með Lost? Við Ásgeir höfum fylgst spenntir með frá byrjun og horfum nú alltaf á nýjustu þættina á netinu. Alltaf verður þetta skrýtnara.
Kveðja, Pétur.

Föstudagur

2008-03-28T21:33:00.003+01:00

Nú er krufningalotunni lokið, a.m.k. í bili. Enn fleiri áhugaverð tilfelli hafa komið í ljós, m.a. "cardiac sarcoidosis" sem til stendur að skrifa grein um. Næsta vika fer í að ljúka krufningaskýrslum og svo fer ég í helgarheimsókn til Ásgeirs. Það var óvænt að mamma hans Ásgeirs ákvað að drífa sig í helgarferð til Barcelona að hitta Ásgeir, hún lendir rétt á eftir.
Ég hef ekkert orðið var við læti út af þessari hollensku mynd um kóraninn og múslimatrú. Ég gerði tilraun til að finna myndina á netinu en hún virðist hafa verið fjarlægð víðast hvar.
Síðdegis í gær fór ég til Utrecht á námskeið í að kódera fyrir meinafræðigagnagrunninn hér í Hollandi. Það er nefnilega svo að allar meinafræðirannsóknastofur í Hollandi nota tölvukerfi þar sem niðurstöður eru skrásettar og fara inn í gagnagrunn. Þannig get ég séð hvort sýni frá sjúklingum sem ég kem að hafi einhvers staðar og einhvern tímann áður farið í rannsókn. Segjum t.d. að ég fái til rannsóknar eitil með meinvarpi. Þá get ég farið í tölvuna og séð hvort sjúklingurinn hafi einhvers staðar í Hollandi farið í aðgerð þar sem sýni sem innihélt frumæxlisvöxt var fjarlægt. Þetta er mjög gagnlegt. Heima á Íslandi eru þrjár meinafræðirannsóknarstofur en gagnagrunnarnir eru ekki tengdir þrátt fyrir smæð landsins. Með því að hafa einn meinafræðigagnagrunn fyrir allt Holland skapast áhugaverðir möguleikar og hægt er að leita að sjaldgæfum sjúkdómum og athuga með fljótlegum hætti tíðni ýmissa sjúkdóma.
Á morgun er svo annað námskeið sem fer fram í Nijmegen. Það er ívið áhugaverðara, dagsnámskeið í taugameinafræði sérsniðið að þörfum unglækna í sérnámi í meinafræði.Eini gallinn er að ég hefði verið til í að sofa út á morgun en þarf í staðinn að vakna klukkan sjö.
Það er fróðlegt að fylgjast með verðbólgu- og niðursveifluástandinu á Íslandi. Menn hafa orðið varir við þetta hér í Hollandi og ég var t.d. spurður um þetta í vinnunni í dag.
Svo datt mér í huga að setja inn tengil á neðangreint lag sem hefur verið vinsælt hér í Hollandi að undanförnu, bara svona til að sýna ykkur hvað er í gangi:
http://www.youtube.com/watch?v=ybmIKkfUzCk&feature=related
Kveðja, Pétur.

Tónlist í vinnunni

2008-03-26T00:13:00.004+01:00

Að lokinni þessari viku klára ég krufningatörnina og fer í hina venjubundnu vinnu. Ýmislegt er lýtur að krufningunum er öðruvísi hér en heima. Sumt mislíkar mér en annað er ágætt og ég hef lært margt nýtt. Eitt af því sem mér finnst þreytandi er að það eru nánast alltaf áhorfendur. Aðra hverja viku eru hér um bil 12 læknanemar og salurinn því fullur af fólki. Ef það eru ekki læknanemar þá eru hjúkrunarfræðingar, löggur, slökkviliðsmenn, starfsfólk af deildinni eða aðrir í kynningu. Í stað þess að geta byrjað vinnuna strax í upphafi vinnudags þarf ég að bíða á meðan læknanemarnir fá klukkutíma kynningu á mánudagsmorgni og aftur þriðjudagsmorgni. Dragist krufning á langinn á þriðjudögum (m.a. vegna læknanemakynningarinnar sem getur dregist fram úr hófi) missi síðan ég af hádegiskennslunni sem við deildarlæknar fáum. Á þriðjudagsmorgnum eru fundir þar sem krufningar síðastliðinnar viku eru ræddar og sýnin skoðuð. Þetta eru fínir fundir - nema þegar læknanemarnir eru viðstaddir og ég sé að hinir deildarlæknarnir nenna síður að mæta þegar læknanemarnir eru á svæðinu. Það er nefnilega þannig að öll umræða fer niður á byrjendastig þegar þeir eru viðstaddir.
Í krufningasalnum eru hljómflutningstæki og í þeim ávallt einn og sami geisladiskurinn sem einn aðstoðarmaðurinn setur í gang þegar hann fer að ganga frá. Mér finnst lagavalið frekar skondið og þar má finna slagara eins og:
http://www.youtube.com/watch?v=zrCuZd9hed0&feature=related
Það er mjög fínt að í meinafræðinni vinna tveir ljósmyndarar og þeir koma um leið og maður vill láta taka mynd af einhverju. Eins er aðstaðan ágæt fyrir utan nokkur smáatriði.
Ásgeir er á fullu að dansa í Barcelona. Senn líður að fyrstu sýningu. Vignir heimsótti hann yfir páskana. Það hefur ekki verið sérlega hlýtt síðustu daga en síðan Ásgeir kom til borgarinnar hefur veður stundum leyft strandferðir. Ég held til Barcelona að heimsækja Ásgeir þarnæstu helgi - gaman, gaman.

Kveðja, Pétur.

Páskar

2008-03-25T00:10:00.003+01:00

Það er lítið að frétta. Yfir páskana hef ég mestmegnis setið yfir tölvunni og unnið í ristilverkefninu, varla farið út. Mestur tími hefur farið í að læra á tölfræðiforritið SPSS og möguleika þess. Mér sýnist ég vera að ná tökum á þessu og nú er kominn nokkur skriður á vinnuna, loksins. Það hefur verið hálfkalt hérna og svo snjóaði lítillega í gær.
Ég ætlaði alltaf að bera saman nokkra hluti varðandi Landspítalann og spítalann þar sem ég vinn.
*Einn munurinn er sá að hér fær maður ekki ótakmarkað magn af spítalafötum heldur aðeins tvö sett af hverri flík sem tölvukerfi skammtar manni. Maður fær ekki hreinan fatnað nema maður hafi skilað inn því sem áður hefur verið úthlutað.
*Það er ágætt tölvukerfi hér þar sem hægt er að nálgast allar rannsóknarniðurstöður, læknabréf, aðgerðarlýsingar og slíkt en mér finnst skrýtið að innlagnarnótur eru ekki pikkaðar inn.
*Í Hollandi eru kennitölur ekki notaðar í heilbrigðiskerfinu. Allir eru reyndar með visst númer en það kemur frá skattinum. Þetta getur valdið ruglingi því að þegar sjúklingur innritast á sjúkrahúsið í fyrsta skipti fær hann númer sem er bara notað þar en ekki á öðrum sjúkrahúsum. Fyrst og fremst er stuðst við fæðingardaga og nöfn. Í meinafræðigagnagrunninum sem nær yfir allt landið getur einstaklingum slegið saman út af þessu. T.d. gerði ég krufningu um daginn þar sem öll líffæri voru til staðar en samkvæmt tölvukerfinu var búið að fjarlægja milta og hluta af ristli. Þarna hafði tveimur einstaklingum með algengt nafn og sama fæðingardag verið ruglað saman.
*Hér er engin stimpilklukka og maður fær alltaf full mánaðarlaun. Einu sinni á ári skilar maður skýrslu þar sem kemur fram hversu marga frídaga maður tók sér og þá er reiknað út hvort maður er í plús eða mínus hvað varðar frídagana.

Kveðja, Pétur.

Skriffinskudraugurinn

2008-03-19T23:49:00.003+01:00

Skriffinskudraugurinn hefur látið á sér kræla. Sýklarannsóknastofan hefur nokkrum sinnum kvartað undan mér því að ég fylgdi ekki alveg reglunum: fyrir hvern sýklaræktunarpinna þarf ég nefnilega að fylla út sér beiðni. Dæmi: Ef ég tek sýni til sýklaræktunar úr hvoru lunga þarf tvær beiðnir með öllum tilheyrandi upplýsingum. Til samanburðar þá koma oft mörg ílát frá einum og sama sjúklingi til rannsóknar í meinafræðinni en bara ein beiðni þar sem er tilgreint hvað er í ílátunum. Eftir að kvartað var yfir mér þá fylgdi ég skriffinskureglunum enda yfirleitt lítið af ræktunum og í mesta lagi 3-4 beiðnir. Hins vegar vildi svo til að fyrr í vikunni þurfti ég að taka um það bil 20 sýkla- og bakteríuræktanir. Ég hafði engan tíma fyrir alla þessa skriffinsku þannig að ég sendi tvær beiðnir, eina fyrir veirurannsókn og eina fyrir sýklarannsókn. Einhver manneskja inni á sýklarannsókn froðufelldi yfir þessum skandal og á endanum fékk ég hjálp við að fylla út beiðnirnar og senda. Næst brá ég á það ráð að ljósrita og vita hvað myndi gerast þá. Þá var aftur hringt. Beiðnirnar eru jú í tvíriti og ljósrit duga því ekki. Telst þetta óhentug skriffinska eða hvað?

Hvað er að frétta?

2008-03-15T16:00:00.003+01:00

Það er nú ekki mikið. Ég hef verið með krufningar þessa vikuna. Í dag sit ég hér og vinn í ristilverkefninu, straujaði áðan skyrtur og þvoði þvott. Svo tókst mér að gleyma pasta á eldavélinni í hádeginu, allt vatnið gufaði upp úr pottinum og þetta var á góðri leið með að brenna. Ég er á bakvakt þessa helgi þannig að allt verður í rólegum gír (svo fremi sem ég læt ekki kvikna í). Á frönsku svölunum hanga blómapottar með túlípönum sem Ásgeir plantaði. Þeir stækka með hverjum deginum og springa von bráðar út. Þá verða íslenskir fánalitir hjá okkur.

Ásgeir er kominn með herbergi í Barcelona. Hann leigir hjá tveimur strákum frá Suður-Ameríku. Þeir eiga ofnæmisvaldandi kött. Það eru hlýindi í Barcelona og Ásgeir fór á ströndina. Mestur tími fer þó í vinnuna sem er krefjandi því að stutt er í fyrstu sýningu og margt að læra og ná tökum á.

Jæja, nú ætla ég að fara út í búð og kaupa í matinn.
Kveðja, Pétur.

Ásgeir í BCN

2008-03-09T14:04:00.003+01:00

Ásgeir ferðaðist fór til Barcelona í morgun. Ekki er komið á hreint hvar Ásgeir verður en hann verður til að byrja með hjá Xavier. Ég sit hér í sófanum og sinni ristilverkefninu óendanlega en ég ætla að reyna að koma því verkefni frá mér sem fyrst. Vonandi verða páskarnir drjúgir hvað þá vinnu varðar. Fyrir liggur að venjast því að vera einn hér í Amsterdam. Einn liðurinn í því er að fara á tónleika í kvöld. Íslenska hljómsveitin Múm ætlar að stíga á stokk og það verður gaman að sjá. Ég fer bæði með Íslendingum og Frökkum sem við Ásgeir þekkjum hér. Ég hef ekki verið í krufningum síðastliðinn einn og hálfan mánuð en byrja á morgun aftur að gera krufningar og stendur það yfir næstu þrjár vikur. Svo get ég hlakkað til þess að fara til Spánar og hitta Ásgeir enda ódýrt og auðvelt að fljúga frá Amsterdam þangað.
Kveðja, Pétur.

Heimilislaus en hamingjusamur

2008-03-04T18:34:00.003+01:00

Nú styttist óðum í að ég fari til Barcelona en húsnæðisleitin hefur ekki alveg gengið nógu vel. Mér stendur reyndar alltaf til boða að vera í litla gestaherberginu hans Xavier vinar okkar, þannig að ég enda nú ekkert á götunni (mamma, þú getur andað léttar). En þar sem ég á von á Vigni vini mínum í heimsókn um páskana og Pétri helgina eftir þá væri hentugra að vera í örlítið stærra herbergi. Xavier hefur verið mér innan handar í þessum húsnæðismálum og ætlar í dag að skoða fyrir mig herbergi sem er skammt frá þeim stað þar sem dansflokkurinn æfir.
Eins og ég sagði áðan hefur húsnæðisleitin hefur verið nokkuð strembin á köflum og sem dæmi má nefna að á mig hefur verið skellt i miðju símtali og stelpa sem ætlaði að leigja mér herbergi í íbúð sinni fyrir 280 evrur á viku (sem væri þá um 1120 evrur á mánuði!!!!!).
Það er hins vegar eitt sem slær allt saman út. Mér bauðst voða fínt herbergi á ágætu verði. Herbergið staðsett á besta stað, steinsnar frá ströndinni. Leigusalinn virtist líka alveg í lagi með að ég ætla bara að vera í íbúðinni í 5 vikur. Vá, næstum of gott til þess að vera satt. Sem það auðvitað var! Viðkomandi vildi að ég myndi sýna fram á að ég gæti væri borgunarmaður fyrir þessu. Til þess stakk hann upp á að ég myndi bara senda Xavier peninginn fyrir leigunni og tryggingunni. Ég átti svo að senda leigusalanum skannað afrit af færslukvittuninni. Leigusalinn sagði samt að færslan yrði að fara fram í gegnum Western Union money transfer eða Money Gram. Þessar peningasendinar er órekjanlegar og virka þannig að maður fær, á færslukvittuninni kóða sem maður gefur svo upp í hvaða útibúi þeirra í heiminum og hefur þá aðgang að peningunum (maður þarf reyndar líka að vita hvað upphæðin er há og hvaðan hún var send).
Xavier átti svo að borga leigusalanum þegar hann færi að skoða íbúðina ef honum litist á hana. Okkur Pétri fannst við sjá nokkur rauð flögg í þessum pósti og ákváðum að googla setningar úr fyrsta póstinum sem við fengum. Þá duttum við inn á þessa síðu. Þetta er spjallsíða stúdenta í Oxford. Mín samskipti við leigusalann eru nánast nákvæmlega eins og þessi sem Hannah lýsir á síðunni.

Hér er meira að segja fyrsta mailið sem ég fékk. Að öllu leyti eins og það sem þessi stúlka virðist hafa fengið, fyrir utan að ég var að leita á Loquo en hún á Gumtree.

Hello,
I saw your advert on LOQUO and i have an apartment that sweet what you
are looking for,let me know if you are still looking ,so that i can
give you details about the apartment.I await your response asap.
Joleen

Við höldum að þetta sé eitthvað Nígeríu svindl þar sem fólk situr á internet kaffihúsi og þræðir sinn lygavef. Það er voða fáránlegt að lenda í svona. Nú get ég varla skoðað húsnæðisauglýsingar lengur án þess að sjá svindl í hverju horni.

En þrátt fyrir að ég sé ekki búinn að finna íbúð þá er ég mjög hamingjusamur.
Ég hlaut nefnilega styrk til þess að fara á ImpulsTanz í Vín, stærstu danshátíð í evrópu. 9. júlí til 13. ágúst. Það voru yfir 1100 dansarar sem sóttu um að fara en einungis 67 fengu styrk. Ég tel mig því vera mjög heppinn. Þessi danshátíð er algjör suðupunktur í dansheiminum. Þarna koma fremstu kennarar og danshöfundar í evrópu og eru með námskeið og vinnustofur auk þess sem margir af flottustu dansflokkunum koma þangað og sýna. Styrkurinn felur í sér að ég fæ að sækja öll þau námskeið og vinnustofur sem ég vil, ég fæ frítt á allar sýningar, ótakmarkaðan aðgang að videosafni hátíðarinnar (sem telur yfir 250 dansmyndir), gistingu í Vín, ókeypis á fyrirlestra og fleira.

Ég er alveg í skýjunum.
Kv. Ásgeir

Mikið að gera

2008-02-27T23:44:00.003+01:00

Það hefur verið mikið að gera í vinnunni undanfarna daga. Það hittist þannig á að á mér lenti hellingur af sýnum og í kvöld varð ég að vinna til hálf ellefu til að ná að vinna þetta niður. Af tilfellum sem ég hef séð á síðustu dögum eru sortuæxli, ristilæxli, lungnaæxli, brjóstaæxli, vangakirtilsæxli, tunguæxli, húðæxli, hóstarkirtilsæxli, fylgjur, leggangabelgur, lifrarsýni, ristill með sárum, hellingur af fæðingarblettum og margt fleira smálegt.
Kveðja, Pétur.

Gamalt og gott

2008-02-24T21:53:00.003+01:00

Rifjaði í gær upp teiknimyndir sem sýndar voru í sjónvarpinu þegar ég var barn.

Munið þið eftir Þrumuköttum:
http://www.youtube.com/watch?v=2Qd_IsxgAf8

Og Drekum og dýflissum:
http://www.youtube.com/watch?v=mfif5DiGMYc

Og Perlu:
http://www.youtube.com/watch?v=20BZID081Vk

Hver man ekki eftir He-man:
http://www.youtube.com/watch?v=JEsHUel04dY
Og ef ég man rétt höfðu flestir íslensk nöfn (Beini, ...). Svo er þarna inni á youtube einnig brot úr þáttum sem rifjast fljótt upp fyrir manni.

Svo voru Gúmmíbirnirnir:
http://www.youtube.com/watch?v=Eni0LHAS464

Transformers:
http://www.youtube.com/watch?v=ZhCtVq5iIa0
Hvað hétu þeir á íslensku?

Prúðuleikararnir:
http://www.youtube.com/watch?v=Uh_aG5MzPVM

Hvað var fleira?